Germaniya kansleri Olaf Shols Rossiya Ukrainaga bostirib kirishidan oldinroq Rossiya prezidenti Vladimir Putinga Ukraina yaqin o‘n yilliklar ichida NATO a’zosiga aylanmasligiga va’da bergani haqida gapirib berdi, deb yozadi Meduza.
“NATO hech qachon Rossiya uchun xavf bo‘lmagan”, — dedi Shols. Uning so‘zlariga ko‘ra, Putin bilan suhbat chog‘ida u Rossiya prezidentini Ukrainaning a’zoligi masalasida: “Bu yaqin 30 yil ichida amalga oshmaydi”, — deb ishontirgan. Germaniya kanslari NATO mamlakatlari urushga qadar “Rossiya xavfsizligi manfaatlari tashvishini qilmagani” haqidagi ayblovlarni rad etdi.
Sholsning so‘zlariga ko‘ra, Putin Yevropadagi liberal va ochiq jamiyatlarni qabul qilishni istamaydi hamda urushni “mutlaqo bema’ni sabablar” bilan boshlagan — masalan, u kanslerga Ukraina va Belarus alohida davlatlar sifatida mavjud bo‘lmasligi kerak, degan.
Shols uning Putin bilan suhbati qachon bo‘lib o‘tganiga aniqlik kiritmadi. Urushdan avval ular 2021-yil 21-dekabrda telefon orqali gaplashgan edi. O‘shanda, Kreml xabariga ko‘ra, Putin Sholsga Rossiyaning xavfsizlik kafolatlari bo‘yicha, NATOni sharqqa siljitish va mamlakatlarga zarbdor qurol-yarog‘ tizimlarini joylashtirishni istisno qiluvchi takliflari haqida gapirib bergan. 15-fevral kuni Shols Moskvaga kelib, Kiyev bilan nizoni susaytirishga chaqirgan. Undan bir kun avval esa kansler Ukrainada Zelenskiy bilan uchrashgan. O‘shanda u Ukrainaning NATOga a’zoligi kun tartibida turmaganini, shuning uchun Moskva buni katta muhokamalar mavzusiga aylantirgani unga g‘alati tuyulayotganini aytgandi.
Putin avvalroq Ukrainani qurolsizlantirish haqidagi talab (Rossiya harbiy operatsiyasi maqsadlaridan biri) Rossiya uchun “mutlaqo real bo‘lgan xavf” tufayli yuzaga kelganini, chunki Ukraina NATOga qo‘shilishni rejalashtirgani va yadro quroliga ega bo‘lish imkoniyati haqida gapira boshlaganini aytgandi. Harbiy operatsiya boshlanishidan oldinroq Rossiya prezidenti Ukrainaning NATOga a’zo bo‘lishi harbiy nizoga olib kelishi haqida fikr bildirgandi, chunki Kiyev, uning so‘zlariga ko‘ra, alyansga qo‘shilganidan keyin Qrimni kuch bilan qaytarib olishga urinadi.
Shols Ukrainaning NATOga qo‘shilishi masalasi kun tartibiga kiritilmaganini avval ham aytgan. U, shuningdek, alyans Moskva va Kiyev o‘rtasidagi ziddiyatga ham aralashmasligini ta’kidlagan.
Izoh (0)