Qozog‘iston prezidenti Qosim-Jo‘mart To‘qayev Germaniya kansleri Olaf Shols bilan uchrashuvda Rossiya-Ukraina urushining yanada avj olishi “tuzatib bo‘lmaydigan oqibatlarga” olib kelishi mumkinligini aytdi.
KazTAG agentligining qayd etishicha, To‘qayev Sholsning iltimosiga binoan urush haqida o‘z fikrini bildirgan. U Rossiyaning harbiy jihatdan yengilmas ekanligini “fakt” deb atadi.
“Urushning yanada avj olishi butun insoniyat va birinchi navbatda Rossiya-Ukraina mojarosiga bevosita aloqador bo‘lgan barcha mamlakatlar uchun tuzatib bo‘lmaydigan oqibatlarga olib keladi. Afsuski, Istanbul bitimini tuzishdan bosh tortish bilan hech bo‘lmaganda sulhga erishish imkoniyati boy berildi. Ammo hali ham tinchlikka erishish mumkin”, dedi To‘qayev.
Qozog‘iston prezidentining so‘zlariga ko‘ra, turli davlatlarning “barcha tinchlik tashabbuslarini” diqqat bilan ko‘rib chiqish, shundan so‘ng harbiy harakatlar to‘xtatilishi, keyin esa “hududiy masalalar” muhokamasiga o‘tish zarur. To‘qayev “davlatlar rahbarlari lavozimga kelib-ketadi, lekin xalqlar, ayniqsa, qo‘shni xalqlar tinch va o‘zaro hamjihatlikda yashashi kerak”ligini ta’kidladi.
“Qozog‘iston Rossiya bilan dunyodagi eng uzun quruqlik chegarasiga ega va mamlakatlarimiz o‘rtasida strategik sheriklik va ittifoqchilik doirasidagi hamkorlik rivojlanib bormoqda. Qozog‘iston, shuningdek, Ukraina xalqiga va uning o‘ziga xos madaniyatiga hurmat bilan qaraydi. Davlatlarimiz o‘rtasida hech qachon kelishmovchilik bo‘lmagan. Kiyevda mamlakatimiz elchixonasi o‘z faoliyatini davom ettirmoqda”, deya qo‘shimcha qilgan u.
Rossiya prezidenti Vladimir Putin 14-iyun kuni Ukrainada harbiy harakatlarni to‘xtatish va tinchlik muzokaralarini boshlash shartlarini ma’lum qilgan edi. Unga ko‘ra, Ukraina Donetsk, Lugansk, Xerson va Zaporojye viloyatlari hududidan qo‘shinlarini to‘liq olib chiqib ketishi hamda NATOga qo‘shilish rejalaridan voz kechishini rasman e’lon qilishi kerak. Bunga javoban Zelenskiy bularni “oldingilaridan farq qilmaydigan ultimatum xabarlar” deb atagan.
Izoh (0)