Casio kompaniyasi o‘zining tibbiyot sohasidagi faoliyatini kengaytirib, Tayvan bozorida ginekologik diagnostika uchun mo‘ljallangan maxsus uskunani taqdim etdi. 2025-yil 30-iyul kuni Tayvanning oziq-ovqat va dori vositalari nazorati agentligi (TFDA) DZ-C100 kolpokamerasi va uni o‘rnatish uchun CST-100M maxsus tayanch (stoyka) ni II toifadagi tibbiy qurilma sifatida rasman ro‘yxatga oldi.
DZ-C100 kolpokamerasi bachadon bo‘ynidagi turli o‘zgarishlarni hamda saraton kasalligini erta bosqichda aniqlash imkonini beradi. Qurilma yordamida bir nechta yuqori aniqlikdagi tasvirlar olinadi. Ular standart, yashil filtrli va polarizatsiyalangan kabi turlarga ajratiladi. Mazkur kameraga sensorli boshqaruv tizimi o‘rnatilgan bo‘lib, mutaxassislar bevosita qurilmaning ekranida zaruriy tekshiruvlarni o‘tkazishlari mumkin.
Kamerani o‘rnatish uchun ishlab chiqilgan CST-100M tayanchi esa balandlik va burchakni moslab, foydalanish jarayonini yanada qulaylashtiradi. Ushbu moslama turli ish sharoitlariga mos va ergonomik jihatdan qulay tarzda ishlab chiqilgan.
Qurilma bilan komplekt tarzda alohida dasturiy ta’minot — D’z Image Viewer C ham o‘rnatilib, u kompyuter orqali olingan tasvirlarni ko‘rish, saqlash va tartiblash vazifasini bajaradi.
Uskunaning to‘liq to‘plami, ya’ni DZ-C100 kamera va CST-100M stoykadan iborat DZ-C100SET modeli, 495 000 tayvan dollari (taxminan 16 700 AQSh dollari) narxga baholangan. Har bir komponentni alohida sotib olish ham mumkin: kameraning o‘zi 165 000 tayvan dollari (taxminan 5560 dollar), tayanch 365 000 tayvan dollari (taxminan 12 300 dollar)ni tashkil qiladi.
Saratonni aniqlovchi ushbu qurilma dastlab 2022-yilning mart oyida Yaponiyada sotuvga chiqqan bo‘lib, 2023–2024-yillar davomida Yevropa, AQSh, Avstraliya va Yangi Zelandiyada joriy etilgan. Tayvanda ushbu qurilma Casio’ning shu yerda faoliyat yurituvchi sho‘ba korxonasi tomonidan ishlab chiqarilmoqda.
Avvallari soat, kalkulyator va boshqa elektronika mahsulotlari bilan mashhur bo‘lgan Casio kompaniyasi endilikda tibbiy diagnostika sohasiga ham kirib kelmoqda va bu orqali o‘z faoliyat yo‘nalishini kengaytirmoqda.
Izoh (0)