Rossiya prezidenti Vladimir Putin va Germaniya kansleri Olaf Shols telefon orqali suhbatlashdi, deb yozadi Meduza Germaniya hukumati xabariga tayanib.
Suhbat bir yarim soat davom etdi. Tomonlar Ukrainadagi vaziyatni, xususan, Zaporojye AES xavfsizligi masalasini muhokama qildi.
Shols, Germaniya hukumati xabar berishicha, Putinni o‘z qo‘shinlarini Ukraina hududidan to‘liq olib ketishga va vaziyatni diplomatik yo‘l bilan tartibga solishga, shuningdek, Qizil Xoch tashkiloti vakillarining ukrainalik asirlar bilan muloqotini ta’minlashga chaqirdi.
Kreml, o‘z navbatida, Putin “federal kanslerning e’tiborini Ukraina tomonidan xalqaro gumanitar huquq qo‘pol ravishda buzilayotganiga qaratgani” va don bo‘yicha bitimga rioya qilinishi zarurligi, uning doirasida Rossiya o‘g‘iti eksporti uchun to‘siqlar bartaraf etilishi kerakligini eslatgani haqida xabar berdi.
Kreml saytidagi rasmiy xabarlarga qaraganda, Putin va Shols 28-maydan buyon telefon orqali muloqot qilmagan. Urushning ilk uch oyi mobaynida esa ular naq to‘qqiz marta qo‘ng‘iroqlashgan (ularning ba’zilarida Fransiya prezidenti Emmanuel Makron ham qatnashgan).
Izoh (0)