Toshkent viloyati Ohangaron tumani sudida manzil koloniyada jazo muddatlarini o‘tayotgan 14 nafar shaxsning ishini ko‘rib chiqish vaqtida sudya mantiyasiz, bayonnoma yuritmasdan ish ko‘rgani yuzasidan xizmat tekshiruvi tayinlangani haqida xabar berilgan edi.
Holat yuzasidan Sudyalar oliy kengashi matbuot xizmatining qo‘shimcha axborotida aytilishicha, Toshkent viloyat sudlari sudyalari malaka hay’ati tomonidan o‘tkazilgan xizmat tekshiruvi natijasiga ko‘ra, jinoyat ishlari bo‘yicha mazkur tuman sudining raisi va sudyasiga nisbatan ogohlantirish intizomiy jazo chorasi qo‘llangan.
Qo‘shimcha qilinishicha, tuman sudi raisi va sudyasi Toshkent viloyat sudlari sudyalari malaka hay’atining ushbu qaroriga nisbatan Sudyalar oliy malaka hay’atiga (shuningdek, Sudyalar oliy kengashiga ham) shikoyat qilish huquqiga ega.
Ma’lumot uchun, 2024-yil davomida 32 nafar sudyaning vakolati muddatidan avval tugatilgan. Shundan 13 nafari sudyalik qasamyodini buzgani uchun, 6 nafari Sudyalar odobi kodeksi talablarini buzgani uchun va 13 nafar sudyaning o‘zi ariza bergani uchun vakolati muddatidan avval tugatilgan.
Izoh (0)