Ijtimoiy tarmoqlarda fuqarolik ishlari bo‘yicha Farg‘ona tumanlararo sudining sudyasi ochiq sud majlisidan blogerni haydab chiqargani haqida xabarlar tarqalmoqda.
Unda aytilishicha, bloger sudya D.Ismatullayeva raisligida ko‘rib chiqilayotgan fuqarolik nizosiga doir sud majlisi jarayonini videotasvirga olishni so‘rab iltimosnoma kiritgan. Iltimosnomani joyida ajrim chiqarib, rad qilishdan tashqari, sudya blogerni ham sud majlisidan chiqarib yuborgan.
Oliy sud plenumining qaroriga ko‘ra, fuqarolik ishini ko‘rishda ochiq sud majlisini fototasvirga tushirish, videoyozuvni amalga oshirish, shuningdek, ommaviy axborot vositalarida translyatsiya qilish taraflarning roziligi va raislik etuvchi sudyaning ruxsati bilan amalga oshiriladi.
Biroq iltimosnoma rad etilishi bloger yoki jurnalistning sud majlisini tark etishi shart ekanini anglatmaydi. Chunki Oliy sud plenumining mazkur qarorida “... sud majlisi zalida hozir bo‘lganlar har qanday ish bo‘yicha erkin tarzda yozma qaydlar qilishlari, stenogramma yuritishlari (iqtisodiy ish yoki ma’muriy huquqiy munosabatlardan kelib chiqqan ish ko‘rilayotganda esa, shuningdek, audioyozuv olib borishlari) mumkin”ligi belgilab qo‘yilgan.
Mazkur holat yuzasidan Sudyalar oliy kengashidan izoh kutib qolamiz.
Izoh (0)