Prezident “O‘zbekiston Respublikasining ayrim qonun hujjatlariga kommunal to‘lovlarni sud orqali undirishda qulayliklar yaratishga qaratilgan qo‘shimcha va o‘zgartirishlar kiritish haqida”gi qonunni imzoladi.
Hujjatda aytilishicha, ko‘p kvartirali uylarni boshqaruvchi tashkilotlar hamda uy-joy mulkdorlari shirkatlari tomonidan xizmatlar ko‘rsatilishida barqarorlikni ta’minlash maqsadida aholiga ko‘rsatiladigan xizmatlar uchun majburiy badallar va to‘lovlarning o‘z vaqtida to‘lab borilishini ta’minlash zaruriyati yuzaga kelmoqda.
Ushbu qonun bilan Fuqarolik protsessual kodeksga ko‘p kvartirali uyning joylari mulkdorlaridan majburiy badallar va to‘lovlarni undirish bo‘yicha sud buyrug‘ini berish to‘g‘risidagi ariza bilan fuqarolik ishlari bo‘yicha sudga murojaat etilganda arizaga ilova qilinishi zarur bo‘lgan hujjatlar ro‘yxatini belgilashni nazarda tutuvchi qo‘shimchalar kiritilmoqda.
Ya’ni, sud buyrug‘ini berish to‘g‘risidagi arizaga quyidagilar ham ilova qilinishi lozim:
- ko‘p kvartirali uydagi joylar mulkdorlari umumiy yig‘ilishining ko‘p kvartirali uyni boshqarish usulini tanlash to‘g‘risidagi qarorining ko‘chirma nusxasi;
- ko‘p kvartirali uyni boshqarish shartnomasining ko‘chirma nusxasi — ko‘p kvartirali uyni boshqarish organi tomonidan shartnoma asosida amalga oshirilgan taqdirda;
- qarz yuzaga kelgan davr ko‘rsatilgan qarz hisob-kitobi;
- qarzni uzish to‘g‘risidagi talabning qarzdorga topshirilganligini tasdiqlovchi ma’lumotlar.
Bundan tashqari “Davlat boji to‘g‘risida”gi qonunda ko‘p kvartirali uylarni boshqarish organlari o‘zlari ko‘rsatgan xizmatlar uchun majburiy to‘lovlar bo‘yicha qarzdorlikni undirish haqidagi da’volar, arizalar va shikoyatlar bilan fuqarolik ishlari bo‘yicha sudlarga hamda iqtisodiy sudlarga murojaat qilishda oldindan davlat bojini to‘lashdan ozod qilinishi belgilanmoqda.
Bunda ularning talablarini qanoatlantirish to‘liq yoki qisman rad etilgan taqdirda, davlat boji talablarning qanoatlantirilishi rad etilgan miqdoriga mutanosib ravishda undiriladi.
Qonun 8-noyabrdan kuchga kirdi.
Avvalroq kam ta’minlangan oilalarga gaz va elektr energiyasi uchun pul berilishi ma’lum qilingandi. Kam ta’minlangan oilalarga beriladigan bir martali kompensatsiya uchun davlat 370 milliard so‘m yo‘naltiradi. Bu mablag‘lar isitish mavsumida gaz va elektr energiyasiga xarajatlarni qisman qoplashga yordam beradi.
Izoh (0)