Qashqadaryo viloyat sudining iqtisodiy ishlar bo‘yicha sudlov hay’ati taftish instansiyasida kutilmagan holat ro‘y berdi. Javobgar “Samandar nur” fermer xo‘jaligining da’vogar “Agrobank” ATBga nisbatan iqtisodiy ish bo‘yicha Qarshi tumanlararo iqtisodiy sudining 2023-yil 2-avgustdagi hamda Qashqadaryo viloyat sudi iqtisodiy ishlar bo‘yicha sudlov hay’ati kassatsiya instansiyasining 2024-yil 15-avgustdagi qarorlarining bekor qilinishi so‘rab yozilgan taftish shikoyatini ko‘rib chiqayotgan sudlov hay’ati tarkibida muzokara bosqichida o‘zgarish bo‘ldi. Raislik etuvchi to‘satdan ta’tilga chiqib, o‘rnini boshqa sudya egalladi. Bu haqda sudda qatnashgan “Daryo” muxbiri xabar berdi.
2024-yilning 1-noyabr kuni bo‘lib o‘tgan navbatdagi sud majlisida sudlov hay’atiga raislik etuvchi Astanov o‘rnini sudya Bozorovning egallashi fermer tomonidan sudyani rad etishga sabab bo‘ldi. Biroq yangilangan sudlov hay’ati “otvod”ni rad etdi. Shundan so‘ng fermer ishni boshqa sudga o‘tkazishni so‘rab 2024-yil 4-noyabrda Oliy sudga ariza yozdi.
Iqtisodiy protsessual kodeksning 324-3-moddasiga asosan taftish tartibidagi shikoyat Qoraqalpog‘iston Respublikasi sudi, viloyatlar, Toshkent shahar sudlari tomonidan taftish tartibidagi shikoyatni ish yurituvga qabul qilish to‘g‘risida ajrim chiqarilgan kundan e’tiboran bir oydan ortiq bo‘lmagan muddatda ko‘rib chiqilishi alohida hollarda shikoyatni ko‘rib chiqish muddati ishni ko‘rayotgan sudlov hay’ati tomonidan ko‘pi bilan bir oyga uzaytirilishi mumkinligi belgilangan.
Taftish tartibidagi shikoyatni ish yurituvga qabul qilish to‘g‘risida ajrim 2024-yil 4-sentyabrda chiqarilgan bo‘lib, uzaytirilish bilan bog‘liq qo‘shimcha bir oylik muddat ham o‘tib ketdi. Biroq Qashqadaryo viloyati sudi iqtisodiy ishlar bo‘yicha sudlov hay’ati tomonidan asossiz ravishda ishni ko‘rib yakuniy qaror chiqarish kechiktirib kelinmoqda.
Bugungi kunda qo‘shimcha uzaytirish bilan ham muddatning to‘liq o‘tib ketgani ish bo‘yicha protsessual muddatlar va harakatlar to‘liq ravishda buzilganini ko‘rsatadi. Ikkinchidan, 2024-yil 1-noyabrdagi sud majlisida ish mazmunan ko‘rib chiqilishi belgilangani hamda sud majlisida muzokara qilish vaqti kelgan paytda sud tarkibida o‘zgarish bo‘lgani aytildi. Shuningdek, sud tarkibida o‘zgargan sudya Bozorov (raislik qiluvchi) avvaldan mening mazkur ish bilan chambarchas bog‘liq da’vo predmetlarimni rad qilgani uchun uning xolisligiga menda shubha tug‘ilmoqda.
Shu sababli Iqtisodiy protsessual kodeksning 20-moddasiga asosan mazkur sudyani rad qilishni so‘rab bergan iltimosnomam sudlov hay’ati tomonidan yangi tarkibni shakllantirish imkoni yo‘qligi sababli rad etildi, deydi fermer.
Tadbirkor-fermerning eslashicha, avvalroq sudya Bozorov raisligidagi Qashqadaryo viloyat sudi iqtisodiy ishlar bo‘yicha sudlov hay’ati taftish instansiyasi qarori bilan “Samandar nur” fermer xo‘jaligining zararni undirish bo‘yicha javobgar MIB Nishon tuman bo‘limidan undirilishi belgilangan 355 million so‘m miqdordagi Qarshi tumanlararo iqtisodiy sudi tomonidan qanoatlantirilgan qarori asossiz ravishda bekor qilingan. Mazkur apellyatsiya instansiyasi qarori 2024-yil 1-avgust kuni Samarqand viloyat sudi iqtisodiy ishlar bo‘yicha sudlov hay’ati taftish instansiyasi tomonidan to‘liq bekor qilinib, “Samandar nur” fermer xo‘jaligi foydasiga qaror qabul qilingan.
Mazkur holatni sudya Bozorov tomonidan ushbu iqtisodiy ishni ko‘rishda uning xolisligiga to‘liq shubha tug‘diruvchi holat sifatida baholayman hamda ishni har taraflama adolatli ko‘rishiga to‘liq ishonchim yo‘q, deydi fermer.
Izoh (0)