Toshkent viloyati Ohangaron tumani sudida manzil koloniyada jazo muddatlarini o‘tayotgan 14 nafar shaxsning ishi ko‘rib chiqilgan. Bu haqda inson huquqlari “Ezgulik” jamiyati raisi Abdurahmon Tashanov xabar bermoqda.
Abdurahmon Tashanovning aytishicha, 8-oktyabr kuni jinoyat ishlari bo‘yicha Toshkent viloyati Ohangaron tumani sudida manzil koloniyada jazo muddatlarini o‘tayotgan 14 nafar shaxsning ishi ko‘rib chiqilgan. Sudda jamiyat faoli Zarif Mirzaaxmedov mahkum Ilhom Karimovning huquqlarini himoya qilgan.
Sudya Sardor Boboqulov mahkamaga sudyalarning libosi — mantiya kiymay chiqdi. Mahkama jarayonida sud bayonnomasi yuritilmadi, savol-javoblardan so‘ng mahkumlarga nisbatan ajrim chiqarildi, sudya mahkamani yopdi.
Huquq himoyachisi Zarif Mirzaaxmedov bu holat yuzasidan sud raisiga shikoyat qildi. Sud raisi darhol chora ko‘rishini aytdi. Sudya Sardor Boboqulov mahkumlarni sud zaliga qayta kiritib, mantiya bilan chiqdi. Kotib bayonnoma yuritdi, mahkama videoga olindi. Go‘yo, hammasi joyida.
Sudni, qonunchilikni tushunmagan odam bu yerda qanday qabihlik borligini ham tushunmaydi. Aslida sudya nafaqat qonunni buzdi, chuqurroq qaralsa jinoyat ham qildi. Ya’ni, uning mahkamani mantiyasiz o‘tkazgani kasbiy professional faoliyatiga nisbatan hurmatsizligidir, bunga intizomiy chora ham qo‘llanar, bunda gap yo‘q, deydi inson huquqlari faoli.
Uning qo‘shimcha qilinishicha, hukm o‘qilgach, qayta mahkama o‘tkazish bu jiddiy qonunbuzarlik.
Sudyalar oliy kengashi matbuot xizmatining ma’lum qilishicha, holat bo‘yicha xizmat tekshiruvi tayinlangan.
“Toshkent viloyat sudi sudyalari malaka hay’ati tomonidan o‘tkaziladigan xizmat tekshiruvi natijasi yuzasidan qo‘shimcha axborot beriladi”, deyiladi kengash axborotida.
Izoh (0)