“Biz huquqiy baho berolmaymiz” — Sudyalar oliy kengashi vakili sobiq vazir ochiq sudini yopiq tarzda o‘tkazishga qaror qilgan sudya haqida

Sobiq qishloq xo‘jaligi vaziri Aziz Voitov va 49 nafar sudlanuvchi ishi ochiq sud majlisidan yopiq sud majlisiga aylantirilib, ko‘rila boshlangandi. Sudyalar oliy kengashi mas’ullariga ko‘ra, sudyaning bu ajrimini o‘zgartirish faqatgina taraflar e’tirozidan kelib chiqib yuqori turuvchi instansiyada bekor qilinishi mumkin. 

“Bu sudyaning protsessual harakatlari hisoblanadi. Sudyaning bu protsessual harakatlariga Sudyalar olish kengashi huquqiy baho berish vakolatiga ega emas. Faqatgina yuqori sud instansiyasi ko‘rib chiqishi mumkin”, deydi bu haqda gapirgan Sudyalar oliy kengashi raisining matbuot kotibi Tursunali Akbarov. 

Sudyalar oliy kengashi raisining axborot siyosati masalalari bo‘yicha maslahatchisiga ko‘ra, Aziz Voitov va 49 nafar sudlanuvchi ishi haqiqatdan ham ochiq sud majlisida ko‘rila boshlangan. Sudda jurnalistlar faoliyatining cheklanishi esa taraflar fikridan kelib chiqilgan holda amalga oshirilgan. 

“Birinchi sud ajrimida sudda jurnalistlarning ishtirok etishiga hech qanday monelik yo‘qligi, faqat ularning ish qurollaridan foydalanib, foto, video va audiomateriallar olishi sud ishiga raislik etuvchining ruxsati bilan amalga oshiriladi deyilgandi. Bu qonunda ham bor. Jinoyat protsessual talablaridan kelib chiqadigan bo‘lsak, jarayonni ommaga yoritishda, sudning ochiqligini ta’minlashda albatta taraflar fikri inobatga olinadi. Esingizda bo‘lsa dastlabki sud majlislarida ayrim sudlanuvchilarning advokatlari jarayonni tasvirga olishga e’tiroz qilishgandi.

E’tirozlardan kelib chiqib, sud shunday to‘xtamga kelgan. Sudning yopiq tarzda o‘tkazilishiga keladigan bo‘lsak, keyingi sud majlislarida sudlanuvchilarning advokatlaridan talabnoma tushib, sud yopiq tarzda ko‘rilsa, jurnalistlar ishtirok etmasa, degan iltimosnoma berildi. Bu iltimosnoma ham muhokama qilindi va sudda ishni ko‘rish jarayonida ayrim ahamiyatli ma’lumotlarning sizib chiqishining oldini olish, shuningdek, sudga ijtimoiy bosimlar bo‘lishining oldini olish maqsadida sudni yopiq tarzda o‘tkazish bo‘yicha ajrim chiqarildi. Bu ajrimga nisbatan norozilar bo‘lsa, bu haqda sud instansiyasiga murojaat qilishlari mumkin”, dedi Tursunali Akbarov.