Shaxsiy suvosti kemasi va “Uyda yolg‘iz 2” filmidagi xona: dunyodagi eng qimmat mehmonxonalar qanday ko‘rinishda? (foto)

Hech bo‘lmaganda bir kunga hashamat, boylik va eksklyuziv servis dunyosiga tushishni kim ham orzu qilmagan? Biz Nyu Yorkdan Dubaygacha, Jeneva ko‘lidan Karib dengizigacha bo‘lgan turli hududlardan dunyodagi eng qimmat va hashamatli mehmonxonalar ro‘yxatini tuzdik. Ushbu mehmonxonalarda bir kecha qolish narxi 30 ming dollardan 300 ming dollargacha baholanadi.

Lovers Deep Luxury, Sent Lyusiya

Lovers Deep Luxury Hotel suv ostida taxminan 200 metr chuqurlikda joylashgan bo‘lib, bortda faqatgina bitta xona bor, shuning uchun butun mehmonxona to‘liq sizning ixtiyoringizda bo‘ladi. Bort kapitani, oshpaz va yordamchi xodim bundan mustasno. Mehmonlarning maxfiyligini ta’minlash uchun xodimlar kemaning boshqa qismida yashaydi.

Mehmonxonaga tashrif buyurganlar kema qaysi yo‘nalishda harakatlanishini o‘zlari tanlaydi. Bir kechaga to‘lanadigan narx ichiga tezyurar qayiq yoki vertolyotda transfer qilishni o‘z ichiga oladi.

Palms Casino Resort, Las Vegas, AQSh

Las Vegasdagi eng mashhur mehmonxonalardan biri uchta osmono‘par binodan iborat bo‘lib, ularning har biri o‘ziga xos dizaynga ega. Mehmonlar panoramali oynalar orqali shahar manzarasini kuzatishi, shaxsiy basseyn yoki spa xizmatlariga ega xonalarni tanlashlari mumkin. Eng qimmat xona bir kecha uchun 100 ming dollar turadi.

Mehmonxonada muntazam ravishda taniqli san’atkorlar va DJ’larning konsertlari bo‘lib o‘tadi, u yerda qulay sharoitlarga ega 2500 kishigacha sig‘adigan konsert zali mavjud. Mazkur mehmonxona passiv dam olishni emas, baki shovqinli va o‘yin-kulgiga to‘la muhitni istovchilar uchun ayni muddao.

Hotel President Wilson, Jeneva, Shveytsariya

Qirollik oilalariga xos maxsus penthaus mehmonxonani boshqa joylardan ajratib turadigan atributidir. U mehmonxonaning butun qavatini egallagan bo‘lib, Yevropadagi eng katta va eng qimmat lyuks nomer sanaladi.

Mehmonxonada Scotch 80 Prime, APEX Social Club, KAOS Dayclub & Nightclub kabi mashhur restoran va klublar mavjud, 55-qavatda Sky Bar joylashgan. Shuningdek, 9000 kvadrat metrdan ortiq maydonga ega kazino ham mavjud.

Pentxausda 12 ta yotoqxona, shaxsiy koridor, shaxsiy lift, sport zali, basseyn, jakuzi, sauna va hatto Steinway & Sons firmasiga mansub pianino bor. Ushbu xonada bir kecha qolish uchun 68 ming dollar to‘lanadi.

Deyarli barcha prezidentlar, qirollik oilalari a’zolari, hatto Microsoft asoschilaridan biri Bill Geyts va mashhur aktyor Maykl Duglas ham shu yerda qolishgan. Bunday muhim shaxslar uchun xonalar barcha xavfsizlik standartlariga javob beradi.

The Plaza, Nyu York, AQSh

Manxettendagi tarixiy bino nafaqat Nyu Yorkdagi eng nufuzli mehmonxonalardan biri, balki rejissyorlar uchun ham ilhom manbai hisoblanadi. Mehmonxonada “Uyda yolg‘iz 2”, “Ayol ifori”, “Buyuk Getsbi” va boshqa filmlar suratga olingan.

Mehmonxona 1907-yilda ochilgan bo‘lib, bu yerda AQSH prezidentlari, qirollik oilalari aʼzolari va taniqli shaxslar yashagan va hozir ham shu yerda qolishadi. Har bir xona billur qandillar, marmar pollar, ko‘plab oltindan yasalgan dekoratsiyalar bilan to‘ldirilgan. Derazadan markaziy parkni tomosha qilish mumkin.

Mehmonlar uchun restoranlar, barlar, spa, fitnes markazi, go‘zallik salonlari, butiklar, konferensiya va banket zallari mavjud. Eng hashamatli xonaning bir kecha uchun narxi 40 ming dollarni tashkil qiladi.

Burj Al Arab Jumeirah, Dubay, BAA

Burj Al Arab mehmonxonasi kema yelkani kabi shakli tufayli Dubayning o‘ziga xos belgisiga aylandi. Burj Al Arabning balandligi 321 metr, shuning uchun u nafaqat eng qimmat, balki dunyodagi eng baland mehmonxonalardan biri hisoblanadi. Xonalardan Dubay, Arabiston va Fors ko‘rfazi manzaralarini tomosha qilish mumkin.

Mehmonxonaning ba’zi xususiyatlari murakkab muhandislik yechimlarining kashfiyotidir. Bino sun’iy orolda qirg‘oqdan 280 metr uzoqlikda joylashgan. Poydevorni mustahkamlash uchun qirq metr chuqurlikda 230 ta qum uyumi yotqizilgan. Eng hashamatli xonada bir kecha qolish uchun 30 ming dollar to‘lash kerak.

Mehmonxonaning 27-qavatida Al-Muntaha (arabcha “eng baland”) ochiq restorani bor, u yerda Fors ko‘rfazi va Dubayning ajoyib manzarasi namoyon bo‘ladi. Mehmonxona rasman Besh yulduzli Deluxe sifatida tan olingan. Ammo ba’zida u “dunyodagi yagona yetti yulduzli mehmonxona” deb ta’riflanadi.