Ilon Mask AQSHning saylangan prezidenti Donald Tramp va Vladimir Zelenskiyning telefon orqali muloqotida ishtirok etdi. Bu haqda Axios portali manbalarga tayanib xabar berdi.
Ma’lum bo‘lishicha, Mask suhbat chog‘ida Ukrainaga Starlink aloqa tizimiga kirishni taʼminlashda davom etishini taʼkidlagan. Nashrga ko‘ra, milliarderning telefon suhbatidagi ishtiroki uning Tramp ma’muriyatining kelajakdagi faoliyatida qanchalik muhim rol o‘ynashini ko‘rsatishi mumkin.
Trampning Zelenskiy bilan suhbati taxminan 25 daqiqa davom etgan. Respublikachi Ukrainani qo‘llab-quvvatlashga va’da bergan.
“Zelenskiy va yordamchilari Tramp hamda uning jamoasidan eshitgan hech bir gap Ukrainaning xavotiriga sabab bo‘lmadi”, dedi Axios suhbatdoshlaridan biri.
Avvalroq The Wall Street Journal AQSH prezidentlik saylovlarida g‘alaba qozongan Tramp jamoasining Ukrainadagi mojaroni bartaraf etish rejalari haqida yozgan edi. WSJ maʼlumotlariga ko‘ra, Trampning maslahatchilari front chizig‘i bo‘ylab 1,3 ming km uzunlikda qurolsizlantirilgan hudud yaratmoqchi, ayni paytda AQSH u yerga tinchlikparvar kuchlarini yubormaydi.
“Ukraina kamida 20 yil davomida NATOga kirmaslik majburiyatini olishi kerak. Buning evaziga Vashington Kiyevni kelajakda mojaro qayta tiklanishiga yo‘l qo‘ymaslik uchun qurol-yarog‘ bilan ta’minlaydi”, deb yozadi WSJ.
Izoh (0)