“Европа иттифоқи мамлакатлари расмийлари Украинага АҚШ кўмагисиз ёрдам ажратиш механизмини муҳокама қилмоқда”, деб ёзади The Wall Street Journal манбаларга таяниб.
Нашрнинг қайд этишича, жорий йил 7 ноябрь куни Европа сиёсий ҳамжамиятининг саммити бўлиб ўтган Венгрия парламентида ташкил этилган кечки овқатда Европа давлатлари вакиллари ушбу ташаббусни муҳокама қилган.
WSJ мақоласида қайд этилишича, Европа иттифоқи етакчилари биринчи марта АҚШнинг сайланган президенти Дональд Трамп Украинага ёрдамни тўхтатса, “бўшлиқни қандай тўлдириш”ни муҳокама қилган. Сиёсатчилар агар Американинг янги президенти шундай қарор қабул қилса, Украинани қўллаб-қувватлашни кучайтириш зарур деган умумий фикрга келган.
“Франция президенти Эммануэль Макрон ва Италия бош вазири Жоржия Мелони бундай ташаббусга эҳтиёткорлик билан ёндашади”, деб ёзади WSJ. Венгрия ва Словакия вакиллари Украинани молиялаштириш ва қурол-яроқ етказиб беришга қарши чиқди.
Нашрнинг Европа иттифоқидаги манбасига кўра, Еврокомиссия ижроия органи келаси ой Брюсселда йиғилганда АҚШ иштирокисиз молиялаштириш вариантларини тақдим этиши керак бўлади.
АҚШ Украинага энг йирик молиявий ёрдам етказиб берувчи ҳисобланади. Европа иттифоқининг ташқи алоқалар бўйича кенгаши маълумотларига кўра, АҚШ ҳукумати 2022 йил февралидан бошлаб Украинага 106 миллиард доллар ажратган. Бунинг 70 миллиард доллари фақат ҳарбий ёрдамдан иборат.
27 давлатдан иборат Европа иттифоқи Украина ҳукуматига молиявий, гуманитар ва ҳарбий ёрдам сифатида 133 миллиард доллар ажратди.
Жорий йил 7 ноябрь куни Будапештда Европа сиёсий ҳамжамиятининг йиғилиши бўлиб ўтди. Учрашувда Европа иттифоқи етакчилари Америкадаги президентлик сайловлари натижалари ва сайланган президент Дональд Трамп билан ўзаро ҳамкорлик стратегиясини муҳокама қилган.
Изоҳ (0)