DXX xodimlari tomonidan Bosh prokuratura huzuridagi departament bilan hamkorlikda o‘tkazilgan tezkor tadbirda Chirchiq shahar hokimining o‘rinbosari 1 mln dollar olgan vaqtida ushlandi.
Hokim o‘rinbosari xizmat mavqeyidan foydalangan holda, klaster shaklidagi savdo majmuasi tashkil etish uchun 40 mln dollar investitsiya kiritish sharti bilan, shahar hokimligi zaxirasidagi 20 gektar yerni auksion savdoga chiqartirib, yutib berish va 49 yil muddatga yerga egalik qilish huquqini rasmiylashtirishda ko‘maklashishni vaʼda qilgan.
Buning evaziga 2 mln dollar talab qilib, oldindan 1 mln dollarni o‘zining haydovchisi orqali olgan vaqtida ushlandi.
Hozirda xizmat mavqeyidan foydalanib, juda ko‘p miqdorda pora olgan hokim o‘rinbosariga nisbatan Jinoyat kodeksining 210-moddasi 3-qismi “a” bandi (Pora olish juda ko‘p miqdorda) bilan jinoyat ishi qo‘zg‘atildi va qamoq ehtiyot chorasi qo‘llanildi.
Maʼlumot uchun, Jinoyat kodeksining 210-moddasi 3-qismi “a” bandi – o‘n yildan o‘n besh yilgacha ozodlikdan mahrum qilish bilan jazolanadi.
Tergov harakatlari olib borilmoqda.
Avvalroq, Dehqonobod tumani hokimi o‘rinbosari 5 ming dollar olgan vaqtida ashyoviy dalillar bilan ushlangan edi.
Izoh (0)