Korrupsiyaga qarshi kurashish agentligi va “Ijtimoiy fikr” markazi tomonidan aprel—may oylarida o‘tkazilgan “Fuqarolar O‘zbekistonda korrupsiya to‘g‘risida” mavzusidagi sotsiologik tadqiqot natijalari e’lon qilindi. Bu haqda agentlik matbuot xizmati xabar berdi.
Qayd etilishicha, 2022-yilda o‘tkazilgan so‘rov bilan qiyoslanganda, korrupsiyaga murosasiz, uning oqibatlarini to‘la anglagan aholi vakillari foizi deyarli 20 foizga ortgan. 2024-yilgi so‘rovda respondentlarning aksariyati — 91,2 foiz (2022-yilda 72,1 foiz) fuqarolarning o‘z muammolarini hal qilish uchun pora berishiga salbiy, 6,3 foiz (4,7 foiz) neytral, befarq, atigi 2,3 foiz ijobiy munosabatini namoyish qilgan.
So‘rov natijalariga ko‘ra, 42,5 foiz respondentlar mamlakatda korrupsiyaning tarqalganlik darajasini “o‘rtacha” deya baholagan, 18,9 foiz korrupsiya darajasi “yuqori”, 11,6 foiz “past” degan fikrda. Korrupsiyaviy vaziyatga tushgan respondentlarning ulushi 21,2 foizni tashkil etgan, 78,8 foiz esa korrupsiyaga oid huquqbuzarliklarga shaxsan duch kelmaganini qayd etgan.
Tadqiqot natijalariga ko‘ra, fuqarolarning fikri asosida, korrupsiyaviy vaziyatga tushib qolish xavfi yuqori bo‘lgan eng korrupsiyalashgan davlat organlari, vazirlik va idoralarning reytingi tuzilgan. Olingan javoblarga ko‘ra, o‘zbekistonliklar ko‘pincha o‘z muammolari yoki masalalarini norasmiy hal qilish holatiga Sog‘liqni saqlash, Oliy taʼlim, fan va innovatsiyalar, Maktabgacha va maktab taʼlimi, Bandlik va kambag‘allikni qisqartirish, Qurilish va uy-joy-kommunal xo‘jaligi, Ichki ishlar vazirligi kabi tuzilmalarda duch kelishadi.
O‘tkazilgan tadqiqotning ko‘rsatishicha, 46,3 foiz fuqarolarning fikricha, mamlakatda korrupsiyaning oldini olish va unga qarshi kurashish, davlat va jamiyat qurilishining barcha sohalarida korrupsiyani keltirib chiqaruvchi omillarni bartaraf etishga qaratilgan chora-tadbirlar mamlakatda korrupsiya darajasini pasaytirishga yordam bermoqda. 26,9 foiz so‘ralganlarning fikricha, ko‘rilayotgan chora-tadbirlarga qaramasdan, korrupsiyaning darajasi o‘sishda davom etmoqda.
Aniqlanishicha, fuqarolarni korrupsiyaviy munosabatlarga va noqonuniy xatti-harakatlarga undaydigan asosiy sabablar byurokratik paysalga solinishlardan qutilish istagi, mavjud muammolarni hal qilishga intilish yoki shunga ehtiyoj, muammoni qonuniy hal qilish uchun vaqt yoki imkoniyatning yo‘qligi hisoblanadi. Shuningdek, pora yordamida masalalarni hal qilish odatiy amaliyot, umumqabul qilingan xatti-harakat, muammoni hal qilishda yordam bergan mansabdor shaxsga minnatdorchilik bildirish shakli hisoblanadi, degan tasavvur jamoatchilikda keng tarqalgan.
Avvalroq 2023-yilda Respublika bo‘yicha jami 6 535 nafar shaxs korrupsiyaga oid jinoyatlar uchun jinoiy javobgarlikka tortilgan bo‘lib, 2022-yilga nisbatan javobgarlikka tortilganlar soni 879 nafarga yoki 12 foizga kamaygani to‘g‘risida xabar berilgandi.
Izoh (0)