Namanganda bozorda savdo bilan shug‘ullanuvchi tadbirkordan pora talab qilgan soliq xodimi qo‘lga olindi. Bu haqda “Daryo”ga viloyat IIB matbuot xizmati ma’lum qildi.
Qayd etilishicha, joriy yil 24-iyun kuni Namangan shahrining Yangi Namangan tumanida yashovchi fuqaro viloyat Ichki ishlar boshqarmasi boshlig‘iga ariza bilan murojaat qilgan. Shaharning “Sardoba” bozorida xo‘jalik mollari savdosi bilan shug‘ullanuvchi tadbirkor o‘z arizasida Namangan shahar davlat soliq inspeksiyasidan bozorga biriktirilgan inspektor har oy soliq to‘lovlarini to‘lamasdan faoliyat yuritish evaziga 500 ming so‘m talab qilayotganligini bildirib, qonuniy chora ko‘rishni so‘ragan.
Arizaga asosan viloyat IIB Korrupsiya va iqtisodiy jinoyatlarga qarshi kurashish bo‘limi tomonidan DXX va viloyat prokuraturasi bilan hamkorlikda tezkor tadbir o‘tkazildi. Tadbirda soliq inspektori arizachidan kimyoviy ishlov berilgan 500 000 so‘mni pora tariqasida olgan vaqtda ushlanib, daliliy ashyolar olingan.
“Mazkur holat yuzasidan viloyat prokuraturasi tomonidan Jinoyat kodeksining 210-moddasi ikkinchi qismi bilan jinoyat ishi qo‘zg‘atilib, gumonlanuvchi protsessual tartibda ushlangan”, deyiladi matbuot xizmati xabarida.
Izoh (0)