Samarqand viloyatining Samarqand shahrida kadastr xodimi 1 000 dollar pora bilan qo‘lga olindi. Bu haqda “Daryo”ga viloyat IIB axborot xizmati rahbari Jahongir Sagdullayev xabar berdi.

Qayd etilishicha, kadastr xodimi avtoturargoh (garaj)ni uyga qo‘shib, omborxona sifatida kadastr hujjatlarini rasmiylashtirib berishni vaʼda qilgan. Hamda evaziga 1 000 AQSH dollari miqdorida pul talab qilgan.

2023-yil 7-iyun kuni fuqaro huquqni muhofaza qiluvchi organlarga ariza bilan murojaat qilib, unda Kadastrlar palatasi Samarqand shahar filiali ishlab chiqarish muhandisi lavozimida ishlovchi shaxs Samarqand shahar A.Jomiy ko‘chasida joylashgan avtoturargoh (garaj)ni uyga qo‘shib, omborxona sifatida kadastr hujjatlarini rasmiylashtirib berishini, evaziga ko‘p pul talab qilganini bayon qilgan.

“Mazkur arizaga asosan, joriy yilning 8-iyun kuni Samarqand viloyati IIB Tezkor-qidiruv xizmati JQB Korrupsiya va iqtisodiy jinoyatlarga qarshi kurashish bo‘limi Yer resurslari talon-toroj qilinishiga qarshi kurashish bo‘linmasi hamda DXX Samarqand viloyati boshqarmasi xodimlari hamkorligida o‘tkazilgan tezkor tadbir davomida, Kadastrlar palatasi Samarqand shahar filiali binosi yonida B.N. ariza muallifidan 1 000 dollarni olgan vaqtida ashyoviy dalillar bilan qo‘lga olindi”, — deyiladi viloyat IIB tarqatgan xabarda.

Qo‘shimcha qilinishicha, mazkur holat yuzasidan tergovga qadar tekshirish harakatlari olib borilmoqda.