Bo‘stonliqda 1,32 gektar yerni 50 ming dollarga sotishga uringan uch nafar shaxs ushlandi

17-may kuni Toshkent viloyatining Bo‘stonliq tumanida dehqon xo‘jaligini yuritish uchun mo‘ljallangan yer maydonini sotishga uringan shaxslar qo‘lga olindi. Bu haqda IIV JQBB Korrupsiya va iqtisodiy jinoyatlarga qarshi kurashish boshqarmasi, Yer resurslari talon-toroj qilinishiga qarshi kurashish bo‘limi ma’lum qildi.

Ma’lum qilinishicha, fuqaro IIVga ariza bilan murojaat qilib, o‘z arizasida tadbirkorlik qilish maqsadida internet tarmoqlaridan yer maydonlarini ko‘rib yurganida o‘ziga notanish bo‘lgan “makler” muqaddam Bo‘stonliq tumani kadastr agentligida ishlagan shaxs bilan tanishtirganini aytib, 1,32 gektar sotiladigan yer borligini bildirgan. Ushbu shaxs Bo‘stonliq tumani “Chimboylik” MFY hududida bog‘dorchilikka ixtisoslashgan dehqon xo‘jaligini yuritish uchun mo‘ljallangan 1,32 gektar yer maydoni borligini, yer maydonlari 3 nafar fuqaro nomlariga rasmiylashtirib qo‘yilgani va ularni 50 ming dollarga sotishlarini ma’lum qilgan.

Shuningdek, fuqaro ular keyinchalik yer maydoniga qurilish uchun hujjatlarni kadastr xodimlari orqali 12 ming dollar evaziga rasmiylashtirishga yordam berishlarini aytganliklarini ma’lum qilib, ularga nisbatan qonuniy chora ko‘rishni so‘ragan.

Mazkur arizaga asosan shu kuni IIV JQBB Korrupsiya va iqtisodiy jinoyatlarga qarshi kurashish boshqarmasi Yer resurslari talon-toroj qilinishiga qarshi kurashish bo‘limi, vazirlik huzuridagi Tergov departamenti, DXX hamda Bosh prokuratura xodimlari hamkorligida tezkor tadbir o‘tkazilgan. O‘tkazilgan tezkor tadbir davomida Chilonzor tumanida joylashgan Humo Arena muz saroyi avtoturargohida o‘tkazilgan tadbir davomida 3 nafar gumonlanuvchi fuqaro ariza muallifidan talab qilingan 62 ming dollardan 59 ming dollarni olgan vaqtlarida ashyoviy dalillar bilan ushlangan.

Holat yuzasidan tergovga qadar tekshiruv harakatlari olib borilmoqda.

Avvalroq Samarqandda tuman hokimining soxta qarori bilan qariyb 20 ming dollarga yer sotgan xo‘jalik rahbari aniqlangani, Davlat kadastrlari palatasi Nurobod tuman filiali mutaxassislari 2 mln so‘m pora bilan ushlangani to‘g‘risida xabar berilgandi.