Andijonda O‘zbekiston fuqarolarini Polshaga ishlashga noqonuniy yuborish bilan shug‘ullanib kelgan firma faoliyatiga chek qo‘yildi, deb xabar beradi Andijon viloyati IIB axborot xizmati.
Andijon viloyati ichki ishlar boshqarmasiga Marhamat tumanida yashovchi fuqaro ariza bilan murojaat qilib, Andijon shahrida Polshaga fuqarolarni ishlash uchun jo‘natayotgan firma borligini eshitganini aytgan.
2022-yil 17-yanvar kuni ushbu firmaga borgan vaqtida Polshaga haydovchilik ishiga jo‘natish uchun unga 3,5 ming dollar berishini, hozirda hujjatlarni rasmiylashtirish va boshqa to‘lovlar uchun oldindan 1,5 ming dollar kerakligini aytishgan. Fuqaro tanishlaridan so‘rab-surishtirgan vaqtida mas’uliyati cheklangan jamiyatning fuqarolarni chel elga yuborish uchun maxsus litsenziyasi yo‘qligidan xabar topib, 1,5 ming dollarni talab qilgan shaxsga nisbatan qonuniy chora ko‘rishni so‘ragan.
Mazkur murojaatga asosan, Andijon viloyati IIB korrupsiya va iqtisodiy jinoyatlarga qarshi kurashish bo‘limi, DXX hamda Bosh prokuratura huzuridagi departamentning Andijon viloyati boshqarmalari xodimlari bilan hamkorlikda tezkor tadbir o‘tkazilgan.
Tezkor tadbir natijasida ariza muallifidan fuqaro uni Polshaga yuk tashish avtomashinasi haydovchiligi vazifasiga ishlash uchun tanishlari orqali ishga yuborish evaziga firibgarlik yo‘li bilan talab qilingan 3,5 ming dollardan 1,5 ming dollarni olgan vaqtida ashyoviy dalillar bilan ushlangan.
Mazkur holat yuzasidan Jinoyat kodeksining 168-moddasi (firibgarlik) 3-qismi “b” bandi va 28, 211-moddasi (pora olish) 2-qismi “a” bandi bilan jinoyat ishi qo‘zg‘atilib, hozirda dastlabki tergov harakatlari olib borilmoqda.
Eslatib o‘tamiz, 2020-yilda ham Andijonda Polshaga ishga jo‘natishni va’da qilib, fuqarolar pullarini o‘zlashtirgan korxona mansabdorlariga jinoiy ish qo‘zg‘atilgandi.
Izoh (0)