Surxondaryoda 2 ming dollarga chegara qo‘shinlari harbiy qismiga ishga kiritib qo‘ymoqchi bo‘lgan shaxs ushlandi

Surxondaryo viloyati Termiz tumanida pul evaziga Chegara qo‘shinlariga ishga kiritmoqchi bo‘lgan shaxs qo‘lga olindi. Bu haqda viloyat Ichki ishlar boshqarmasi xabar qildi.

Termiz tumanida yashovchi fuqaro B.B. 11-aprel kuni viloyat IIB boshlig‘i nomiga ariza bilan murojaat qilgan. U o‘z arizasida aprel oyi boshlarida o‘ziga oldindan tanish bo‘lgan S.D. ismli fuqaro unga Termiz shahrida joylashgan Chegara qo‘shinlarida yuqori lavozimda ishlovchi tanishlari borligini va ular orqali ishga joylashtirib qo‘yishini aytganini ma’lum qilgan. Tanishi ishga joylashtirish xarajatlari 2 ming dollar bo‘lishini, ushbu pullarni bersa, 44 kun o‘tgandan so‘ng viloyatlarning birida joylashgan Chegara qo‘shinlari harbiy qismlariga ishga buyrug‘i chiqishini aytgan. Fuqaro ularga nisbatan qonuniy chora ko‘rishini so‘rab murojaat qilgan.

Arizaga asosan, 11-aprel kuni soat 18:00 larda Surxondaryo viloyati IIB Jinoyat qidiruv boshqarmasi Korrupsiya va iqtisodiy jinoyatlarga qarshi kurashish bo‘limi, DXX Surxondaryo viloyati boshqarmasi hamda departamentning viloyat boshqarmasi xodimlari tomonidan hamkorlikda tezkor tadbir o‘tkazilgan. Tadbir davomida fuqaro S.D. Termiz shahar “Tuproqqo‘rg‘on” mahallasi hududida ariza muallifi B.B.dan talab qilgan 2 ming dollar miqdoridagi puldan 900 dollar hamda 1 million 100 so‘m kimyoviy ishlov berilgan pullarni sanab olgan vaqtida tadbir ishtirokchilari tomonidan ushlanib, protsessual tartibda rasmiylashtirilgan.

Holat yuzasidan S.D.ga nisbatan Jinoyat kodeksining 168-moddasi (firibgarlik) 1-qismi, 28.211-moddasi (pora berish) 1-qismi bilan jinoyat ishi qo‘zg‘atilgan. Hozirda tergov harakatlari olib borilmoqda.

Avvalroq Namanganda ayol 18 nafar fuqaroni shifoxonaga ishga joylash uchun 300 va 500 dollardan olgani aniqlangandi. Shuningdek, Sirdaryoda tez yordamga dispetcherlikka ishga kiritib qo‘yish uchun 700 dollar so‘ragan shifokor qo‘lga olingani, Qoraqalpog‘istonda fuqaroni temiryo‘lga ishga kiritish uchun ming dollar olgan texnikum direktori ushlangani haqida xabar berilgan.