Toshkentdagi “Farhod” dehqon bozori direktori va uning o‘rinbosari tovlamachilikda ayblanib qo‘lga olindi

Toshkent shahridagi “Farhod” dehqon bozori direktori va uning o‘rinbosari bozordagi tadbirkorlardan noqonuniy ravishda pul undirib kelgani aniqlandi, deb xabar beradi IIV Korrupsiya va iqtisodiy jinoyatlarga qarshi kurashish boshqarmasi.

5-aprel kuni Toshkent shahar IIBBga “Farhod” dehqon bozori hududida tadbirkorlik faoliyati bilan shug‘ullanuvchi fuqaro ariza bilan murojaat qilib, unda bozor direktori va uning xavfsizlik bo‘yicha o‘rinbosari Toshkent shahar hokimining 2021-yil 19-fevraldagi 203-sonli “Elga xizmat” va “Arzonlashtirilgan savdo yarmarkalari” savdo nuqtalaridan to‘lov olinmasligi haqidagi qaroriga zid ravishda pul undirib kelayotganini ma’lum qilgan. Bozor rahbariyati pulni to‘lamaganlarni bozordan chiqarib yuborish bilan qo‘rqitib, 2021-yil sentabr oyidan buyon har 10 kunlik savdo faoliyati uchun 660 ming so‘mdan pul mablag‘larini kassir orqali olib kelgan. Tadbirkor oxirgi 2 oy uchun 3,4 million so‘m to‘lashni noqonuniy ravishda talab qilayotganliklarini bildirib, ularga nisbatan qonuniy chora ko‘rishni so‘ragan.

Mazkur arizaga asosan, shu kuni Toshkent shahar IIBB JQB Korrupsiya va iqtisodiy jinoyatlarga qarshi kurashish bo‘limi hamda DXX Toshkent shahar boshqarmasi xodimlari hamkorligida tezkor tadbir o‘tkazilgan. Tadbirda “Xalq banki” Uchtepa filialining “Farhod” dehqon bozoriga xizmat ko‘rsatuvchi kassiri, xizmat xonasida ariza muallifidan 3,4 million so‘m olayotgan vaqtida ashyoviy dalillar bilan ushlangan. Shuningdek, uning yonidan kunlik tushumdan inkassatsiya qilingan 8,3 million so‘m va inkassatsiya qilinmagan 9,15 million so‘m pul mablag‘lari borligi aniqlanib, olingan.

Tezkor tadbir davomida “Farhod” dehqon bozori direktori hamda uning xavfsizlik bo‘yicha o‘rinbosari ushlanib, uning Gentra avtomashinasida qariyb 25 million so‘m pul mablag‘i borligi aniqlangan.

Holat yuzasidan 2022-yil 6-aprel kuni Toshkent shahar IIBB huzuridagi Tergov boshqarmasi tomonidan Jinoyat kodeksining tegishli moddalari bilan jinoyat ishi qo‘zg‘atilib, Jinoyat-protsessual kodeksining 224-moddasi tartibida ushlangan. Jinoyat ishi yuzasidan tergov harakatlari olib borilmoqda.

Avvalroq Samarqandda kirakashlardan har kuni 30 ming so‘m “o‘lpon” olib yurgan shaxslar ushlangani, Toshkentda “Chorsu”dagi savdo joyi uchun 300 dollar pora so‘ragan bozor direktori o‘rinbosari qo‘lga olingani to‘g‘risida xabar berilgandi.