Qirg‘iziston Milliy xavfsizlik davlat qo‘mitasi raisi Qamchibek Tashiyev korrupsionerlarning yaqinlariga davlat lavozimlarida ishlashga ruxsat berilmasligini aytdi. Bu haqda 24.kg xabar berdi.
Korrupsiyachilar qamoqda o‘tiradi, ularning yaqinlariga davlat lavozimlarida ishlashga ruxsat berilmaydi. Biz tegishli qonun loyihasini tayyorladik, dedi Tashiyev.
U uch yildan beri vazirlik mamlakatda poraxo‘rlikka qarshi kurash ishlarini yakunlay olmayotganini ta’kidladi.
Hatto o‘z saflarimizni ham tozalay olmaymiz. To‘g‘ri, korrupsiya ma’lum darajada kamaydi, lekin uni butunlay yo‘q qila olmadik. O‘g‘rilarni qamaymiz, ammo ular yana ozodlikka chiqishadi. Nima qilishimiz kerak? Qonuniy ravishda korrupsiya uchun jazoni kuchaytirish lozim.
Shunday qilishimiz kerakki, korrupsiyaga aralashgan shaxslarning bu harakatni takrorlash imkoniyati bo‘lmasin. Davlat xavfsizlik qo‘mitasi shu yo‘nalishda yangi qonun loyihalarini taklif qilmoqda, dedi Milliy xavfsizlik davlat qo‘mitasi raisi.
Yangi tuzatishlarga ko‘ra, korrupsionerlar o‘z aybiga iqror bo‘lishi va tergov bilan kelishuvga erishishi mumkin.
Ammo endi ular jazo muddatining kamida yarmini qamoqxonada o‘tkazishadi. Bundan buyon korrupsiya va mansab vakolatini suiiste’mol qilganlikda ayblanganlarning barchasi, agar ularning aybi isbotlansa, albatta qamoqda saqlanishi shart. Hech kim bundan qochib qutulmasligi kerak. Korrupsiyaga qo‘l uradigan shaxs, albatta panjaralar ortida qolishini bilishi lozim, ta’kidladi Tashiyev.
U korrupsiya yoki mansab vakolatini suiiste’mol qilgani (pora olgani yoki bergani) uchun qamoqqa olinganlar hech qachon davlat xizmatiga qaytmasligini qat’iy ta’kidladi. Ularning yaqinlari – ota-onalari, farzandlari, qarindoshlari davlat lavozimlarini egallamasligi kerak. Bunday shaxslarga nisbatan muddatidan oldin ozod qilish chorasi qo‘llanilmaydi.
Xulosa o‘rnida u to‘rt yil davomida 10 nafardan ortiq sud tizimi xodimlari korrupsiya va pora olishda ayblanib qo‘lga olingani, biroq ularning birortasi ham qamoqqa yuborilmaganini aytdi.
Izoh (0)