Bosh prokuratura Komil Allamjonov bilan bog‘liq tergov ishi yuzasidan tarmoqlarda tarqalayotgan turli xabarlar bo‘yicha bayonot berdi.
Maʼlum qilinishicha, holat yuzasidan tegishli idoralarning malakali xodimlaridan iborat tezkor-tergov guruhi tuzilib, tergov harakatlari davom etmoqda. Tafsilotlar haqida qo‘shimcha ravishda xabar beriladi.
“Qonunchilikda axborot sohasidagi huquq hamda masʼuliyat aniq belgilangan – buni, ayniqsa, faol va katta auditoriyaga ega blogerlar, ijtimoiy tarmoqlardagi guruh va kanallar maʼmurlari yaxshi his etishlari lozim. Chunki jamiyatda ular tarqatayotgan har qanday axborotni haqiqat sifatida qabul qiladiganlar ko‘p.
Media vakillari ham xuddi davlat organlaridan talab etilgani kabi sohaga oid amaldagi qonunchilik meʼyorlariga rioya etishlari shart ekanligini unutmasligi kerak.
Shunga ko‘ra, jamoatchilik orasida turli noto‘g‘ri talqin va taxminlar tarqalishining oldini olish maqsadida, ommaviy axborot vositalaridan prokuratura organlari xodimlari tomonidan o‘tkazilgan tezkor yoki tergov tadbirlarini yoritishda faqat Bosh prokuratura matbuot xizmati tomonidan taqdim etilgan rasmiy maʼlumotlarga tayanish va havola keltirishni qatʼiy so‘rab qolamiz.
Bosh prokuratura aholi orasida yolg‘on, haqiqatga to‘g‘ri kelmaydigan va vahima chiqarishga qaratilgan materiallarni har qanday shaklda tarqatish uchun jinoiy javobgarlik mavjudligini yana bir bor eslatadi!”, deyiladi bayonotda.
Avvalroq Komil Allamjonovga qurolli hujum uyushtirilgani haqida xabar berilgan edi. Bosh prokuratura matbuot xizmati ma’lum qilishicha, ushbu jinoyatni sodir etgan shaxslarning biri aniqlanib, gumonlanuvchi tariqasida ushlangan.
Komil Allamjonov 2024-yil 30-sentyabrda Prezident administratsiyasi Axborot siyosati departamentining rahbari lavozimidan ozod etilgan edi. U faoliyatini xususiy sektorda davom ettirishini ma’lum qilgan.
Izoh (0)