Nizomiy nomidagi Toshkent davlat pedagogika universitetida 2021-yilning oktabr oyida 3-kurs talabasiga tegajog‘lik qilgani va uni oynadan itarib yuborgani aytilgan dekan o‘rinbosari hibsga olingani xabar qilingandi. Bosh prokuratura matbuot kotibi Hayot Shamsutdinov “Daryo”ga sud ishi bo‘yicha ma’lumot berdi.
Qayd etilishicha, jinoyat ishi bo‘yicha tergov guruhi tuzilib, gumonlanuvchi B.Y. Jinoyat-protsessual kodeksining 227-moddasi tartibida ushlangan. Jinoyat ishi Jinoyat kodeksining 118-moddasi 1-qismi va 105-moddasi 1-qismiga qayta malakalanib, B.Y.ga nisbatan ehtiyot chorasi sifatida qamoqqa olish qo‘llanilgan. 2021-yilning 1-noyabr kuni unga nisbatan Jinoyat kodeksining 25,118-moddasi (nomusga tegishga suiqasd qilish) 1-qismi va 104-moddasi (qasddan badanga og‘ir shikast yetkazish) 1-qismi bilan ayb e’lon qilingan.
4-mart kuni jinoyat ishi bo‘yicha dastlabki tergov harakatlari yakunlanib, tomonlar jinoyat ishi hujjatlari bilan tanishtirilgan. 8-mart kuni jinoyat ishi bo‘yicha ayblov xulosasi tuzilib, xulosani tasdiqlash va tegishli sudga yuborish uchun Yakkasaroy tuman prokuraturasiga yuborilgan. 10-mart kuni Yakkasaroy tuman prokurorining o‘rinbosari tomonidan jinoyat ishi bo‘yicha ayblov xulosasi tasdiqlanib, jinoyat ishlari bo‘yicha Yakkasaroy tuman sudiga yuborilgan.
Eslatib o‘tamiz, talabaga tegajog‘lik qilishda gumonlanayotgan “zamdekan”ga nisbatan 19-oktabr kuni Jinoyat kodeksining 105 (qasddan badanga o‘rtacha og‘ir shikast yetkazish), 118-moddalari (nomusga tegish) bilan jinoyat ishi qo‘zg‘atilgan. 23-oktabr kuni ekspertiza javobi chiqishi bilan dekan o‘rinbosari protsessual tartibda ushlangan. Tergovda qizning o‘zi unga shilqimlik qilganini aytgandi.
Voqea yuzasidan Saida Mirziyoyeva va Komil Allamjonov munosabat bildirib o‘tgandi. Saida Mirziyoyeva bunday holatlarni doimo jamoatchilikka ma’lum qilib turilishi uchun Senat, Bosh prokuratura, IIV va OAVning harakatini birlashtiradigan yirik loyiha zarurligini bildirib o‘tdi. Komil Allamjonov bu fikrga qo‘shilishini ma’lum qildi.
Izoh (0)