Ijtimoiy tarmoqlarda bugun, 26-oktyabr tunda Prezident administratsiyasi Axborot siyosati departamenti sobiq rahbari Komil Allamjonovga qurolli hujum uyushtirilgani haqida xabarlar tarqalgan edi. Mazkur holat yuzasidan Bosh prokuratura axborot xizmati izoh berdi.
Aytilishicha, 26-oktyabr kuni soat 01:40 larda fuqaro S.S. boshqaruvidagi Range Rover rusumli avtomashina Qibray tumani, Ifor ko‘chasi bo‘ylab harakatlangan vaqtida 2 nafar noma’lum shaxs mashinaga o‘qotar quroldan bir necha marotaba o‘q uzib, noma’lum tomonga yashiringan.
Ushbu holatda biror-bir shaxs tan jarohati olmagan. Mazkur holat yuzasidan Jinoyat kodeksining 25,97-moddasi (qasddan odam o‘ldirishga suiqasd qilish) bilan jinoyat ishi qo‘zg‘atildi.
Gumon qilinuvchi shaxslarni aniqlash va ushlash yuzasidan tezkor-qidiruv tadbirlari amalga oshirilmoqda, deyiladi prokuratura axborotida.
Qo‘shimcha qilinishicha, hozirda tegishli idoralarning malakali xodimlaridan iborat tezkor-tergov guruhi tuzilib, tergov harakatlari olib borilmoqda.
Avvalroq Komil Allamjonov boshqa ishga o‘tishi munosabati bilan Prezident administratsiyasi Axborot siyosati departamentining rahbari lavozimidan ozod etilgan edi. U faoliyatini xususiy sektorda davom ettirishini ma’lum qilgan.
