“Har qanday holatda ham jurnalistga, umuman media sohasidagi har bir odamga kuch ishlatish noto‘g‘ri” — Sherzodxon Qudratxo‘ja

O‘zbekiston Milliy media assotsiatsiyasi raisi Sherzodxon Qudratxo‘ja “Sevimli” telekanali xodimlarining ichki ishlar xodimlari tomonidan kaltaklanishi va Andijonda IIB xodimi Human nashri jurnalistining telefonini tortib olgani bo‘yicha tarqalgan xabarlarga munosabat bildirdi.

Men o‘zim ham shu yerda edim, kuzatuvlarim ham bor. Pandemiyadan keyingi davrmi yoki odamlarimiz anchadan beri bu darajadagi futbol ko‘rmagani uchunmi, o‘sha kuni odamlarda ehtiros kuchli bo‘ldi. Bu esa ba’zan agressiya holatlarini keltirib chiqaradi. Tushunamiz, futbol millionlar o‘yini. Lekin biz Osiyo futbol federatsiyasi, sudyalari qarorlarini hurmat qilishimiz kerak. Biz o‘zimizning maydonda, jamoamiz uchun jon kuydiramiz. Shu bilan birga, o‘rnatilgan umumiy futbol qoidalari bor. O‘zbekiston hududida bunga amal qilishimiz lozim. Bu jihatdan biz o‘zimizga xos bo‘lgan vazminlikni, donishmandlikni ko‘rsatishimiz kerak. Afsuski, o‘sha kuni muxlislarning Iroq futbolchilariga va ba’zida bizning jurnalistlarga ham suv idishlari va og‘ir predmetli narsalarni otganlarini ham oqlab bo‘lmaydi.

Biz futbol tomoshabini bo‘lish madaniyatini o‘rganishimiz kerak. Mana ko‘ryapmizki, buning oqibatlari yaxshi bo‘lmayapti...

Endi “Sevimli” telekanali bo‘yicha... Bu haqida biz bir nechta manbalardan surishtiryapmiz. Chunki manbalar har xil ma’lumot berishmoqda. Har qanday holatda ham jurnalistga, tasvirchiga nisbatan, umuman media sohasidagi har bir odamga nisbatan kim tarafdan va qanday maqsadda bo‘lsa ham, kuch ishlatish, tazyiq o‘tkazish yoki tahdid qilish noto‘g‘ri.

O‘zMMA nomidan “kuchishlatar tizim”larni, o‘sha kuni futbol xavfsizligiga javob bergan tizimlarni media olami va uning vakillariga bunday qilmaslikka chaqiramiz!”.

Albatta, OAV xodimlariga kasbiy tazyiq ko‘rsatish, ularga nisbatan kuch ishlatishni keskin qoralaydi hamda bu qonunchilikka zid faoliyat deb hisoblaydi.

Sherzodxon Qudratxo‘ja, O‘zbekiston Milliy media assotsiatsiyasi raisi

IIV matbuot kotibi Shoxruh G‘iyosovning ma’lum qilishicha, telekanal jurnalistlari standionga kirishda janjal uyushtirgan fuqarolar orasida bo‘lgan va operator o‘sha yerda jarohatlangan.

Andijon shahridagi “Yangi bozor” savdo majmuasida esa odamlarga navbat bilan arzonlashtirilgan shakar sotish jarayonini tasvirga olishga uringan jurnalistning telefoni tortib olingan. “Bir qancha urinishlardan so‘ng ham smartfon qaytarib berilmayapti. Yagona sharti – kuch ishlatish yo‘li bilan olingan va IIB xodimining kuch ishlatgani hamda telefonni tortib olgani suratga olingan videoni o‘chirib yuborish ekan”, — deyiladi xabarda.

Shoxruh G‘iyosovga ko‘ra, muxbir odamlarning navbatini va o‘zaro gap talashayotganini tasvirga olish vaqtida, fuqarolar tomonidan ularning yuzlarini tasvirga olishiga e’tiroz bildirilgan. Shundan so‘ng, IIB xodimi jurnalistdan ularning huquqlarini poymol qilmasdan tasvirni o‘chirib tashlash talab qilingan.