Xorazmda oilaviy bolalar uyi rahbari uch nafar voyaga yetmagan tarbiyalanuvchini 10 oy davomida viloyat adliya boshqarmasi va tuman favqulodda vaziyatlar bo‘limi boshliqlari bilan jinsiy aloqada bo‘lishga majburlagani haqida xabar berilgandi. Oliy sud matbuot xizmatining ma’lum qilishicha, prokuraturaning ushbu ikki shaxsga oid protesti ko‘rib chiqilgan.
Qayd etilishicha, 6-aprel kuni Oliy sudning jinoyat ishlari bo‘yicha sudlov hayʼatida Xorazm viloyat sudi jinoyat ishlari bo‘yicha sudlov hayʼati apellyatsiya instansiyasining 2022-yil 27-dekabrdagi ajrimining A.M. va A.Q.ga oid qismini bekor qilib, ishni yangidan apellyatsiya instansiyasi sudida ko‘rish uchun yuborish to‘g‘risidagi Xorazm viloyat prokuraturasining kassatsiya tartibidagi protesti yopiq sud majlisida ko‘rib chiqilgan.
Oliy sud jinoyat ishlari bo‘yicha sudlov hay’ati kassatsiya instansiyasining 6-apreldagi ajrimi bilan Xorazm viloyat prokuraturasining kassatsiya tartibidagi protesti qanoatlantirilib, ushbu jinoyat ishini yangidan appellyatsiya instansiya sudida ko‘rish uchun yuborilishi belgilangan.
Avvalroq ushbu holat yuzasidan munosabat bildirgan Prezident administratsiyasi sho‘ba mudiri Saida Mirziyoyeva qonunchilikda jiddiy muammolar borligi va ushbu bo‘shliqdan jirkanch shaxslar foydalanib qolayotganini alohida qayd etib, Bosh prokuraturadan mazkur holatga alohida e’tibor qaratib, sinchiklab o‘rganishni va huquqiy baho berishni so‘ragandi.
Prezident administratsiyasi rahbari o‘rinbosari Komil Allamjonov pedofillarga nisbatan kimyoviy kastratsiya jazosini qo‘llash yuzasidan qonunchilikka o‘zgartirish kiritish vaqti kelganini aytgandi.
Bolalar ombudsmani ham mehribonlik uyi qizlariga nisbatan qo‘llanadigan har qanday jinsiy jinoyatlarga og‘ir jazo turlarini qo‘llash kerak, degan pozitsiyada. Bosh prokuratura Xorazmda mehribonlik uyi qizlari zo‘rlangani ishi bo‘yicha protest kiritgan.
Izoh (0)