NATO va AQSH Yevropa davlatlari hisobidan Ukrainaga qurol-yarog‘ yetkazib berishning yangi mexanizmini ishlab chiqmoqda, deb xabar bermoqda Reuters agentligi.
Rejaga ko‘ra, Kiyev harbiy kuchlar (VSU) eng ko‘p ehtiyoj sezayotgan qurollar ro‘yxatini tuzadi. Bu ro‘yxat “Ukraina uchun ustuvor talablar ro‘yxati” (Priority Ukraine Requirements List — PURL) deb ataladi.
NATO davlatlari esa ushbu qurollarni o‘z zaxiralaridan yoki AQSHdan sotib olib, Ukrainaga yetkazib beradi. Ushbu yetkazib berishlar uchun to‘lovni NATO tarkibiga kiruvchi Yevropa davlatlari amalga oshiradi. Jarayonni NATO bosh kotibi Mark Ryutte muvofiqlashtiradi.
Qurol-yarog‘ yetkazib berish har biri taxminan 500 million dollar (430 million yevro) qiymatidagi paketlar ko‘rinishida amalga oshirilishi ko‘zda tutilgan.
Yevropalik amaldorning Reuters’ga aytishicha, NATO ittifoqchilari bu yo‘l bilan Ukrainaga jami 10 milliard dollarlik (taxminan 8,6 milliard yevro) qurol yetkazib berishni rejalashtirmoqda. Bu reja qancha muddat ichida amalga oshirilishi haqida esa agentlik suhbatdoshi aniq ma’lumot bermagan.
Izoh (0)