“Real” Mbappening o‘rinbosari kim bo‘lishi borasida bir qarorga kelmagan

Madridning “Real” klubi rahbariyati Kilian Mbappening o‘rinbosari kim bo‘lishi borasida aniq qarorga kelgani yo‘q. Bu haqda Ispaniyaning AS nashri xabar berdi.

Manbaga ko‘ra, klub rahbariyati Endrik va Gonsalo Garsiya o‘rtasida tanlov qilishi kutilmoqda. Har ikki futbolchi ham doimiy o‘yin amaliyotiga ega bo‘lishni istaydi. Shu bois, mazkur holat vaziyatni qiyinlashtirayotgani aytilmoqda. Endrikning yaqinlari madridliklar rahbariyatiga hujumchi boshqa jamoaga o‘tmasligini, u klubda qolib, asosiy tarkib uchun kurashishga tayyor ekanligini aytgan.

Garsiya ham Premyer Liga klublarining qiziqishiga qaramay, “Real”ni tark etish niyatida emas. 21 yoshli hujumchi AQSHda o‘tgan yangi formatdagi Klublar o‘rtasidagi Jahon chempionatida 6 o‘yinda 4 ta gol urib, bosh murabbiy Xabi Alonsoda ijobiy taassurot qoldirgan. Turnirdagi ajoyib o‘yinlaridan so‘ng unga bir nechta klublar taklif yuborgan, ammo u Madridda qolishga qaror qilgan.

Ma’lumot uchun, Endrik o‘tgan mavsumda “Real” safida 37 ta o‘yinda ishtirok etib, 7 ta gol va 1 ta golli uzatma bilan sezilarli hissa qo‘shgan.