“Davlat OAV erkinligi, axborot izlash, olish va tarqatish huquqlarini kafolatlaydi” — Konstitutsiyaning 67-moddasiga yangi normalar kiritilmoqda

O‘zbekiston konstitutsiyasining 67-moddasiga yangi normalarni qo‘shimcha tarzida kiritish ko‘zda tutilmoqda. Bu haqda Konstitutsiyaviy komissiya matbuot kotibi Odiljon Tojiyev ma’lum qildi.

Qayd etilishicha, takomillashtirilayotgan konstitutsiyaga ommaviy axborot vositalari vakillari va ularning faoliyati erkinligini kafolatlash borasida o‘zgartish va qo‘shimchalar kiritilishi belgilanmoqda. Xususan, bosh qomusning 67-moddasiga yangi normalarni kiritish nazarda tutilmoqda.

Amaldagi konstitutsiyaning 67-moddasida: “Ommaviy axborot vositalari erkindir va qonunga muvofiq ishlaydi. Ular axborotning to‘g‘riligi uchun belgilangan tartibda javobgardirlar. Senzuraga yo‘l qo‘yilmaydi”, deya belgilab qo’yilgan.

Odiljon Tojiyevga ko‘ra, ushbu moddaga quyidagi yangi normalarni qo‘shimcha tarzida kiritish ko‘zda tutilmoqda:

“Davlat ommaviy axborot vositalari faoliyatining erkinligini, ularning axborotni izlash, olish, axborotdan foydalanish va uni tarqatishga bo‘lgan huquqlari amalga oshirilishini kafolatlaydi.

Ommaviy axborot vositalarining va jurnalistlarning faoliyatiga to‘sqinlik qilish yoki aralashish qonunga muvofiq javobgarlikka sabab bo‘ladi.

Ommaviy axborot vositalari o‘zlari taqdim etadigan axborotning to‘g‘riligi uchun javobgardir”, – deya ma’lum qilgan Oliy Majlis Qonunchilik palatasi spikerining o‘rinbosari.

Odiljon Tojiyevga ko‘ra, ayni kunlarda konstitutsiyaga o‘zgartish va qo‘shimchalar kiritishga oid konstitutsiyaviy qonun loyihasining umumxalq muhokamasi davomida aholidan kelib tushgan takliflar Oliy Majlis Qonunchilik palatasi mas’ul qo‘mitalari tomonidan umumlashtirilib, maromiga yetkazilmoqda.

Avvalroq prezident Shavkat Mirziyoyev 27-iyun — Matbuot va ommaviy axborot vositalari xodimlari kuni munosabati bilan soha xodimlariga tabrik yo‘llab, so‘z va matbuot erkinligi doimo konstitutsiya, qonunlar hamda prezident himoyasida bo‘lishini aytgandi.

“Keyingi paytda ijtimoiy tarmoqlar orqali ba’zi joylarda ommaviy axborot vositasi xodimlariga mensimay qarash, ularning o‘z vakolati doirasida erkin faoliyat yuritishiga to‘sqinlik qilish holatlari uchrayotgani haqida xabarlar tarqalayotgani ham bu fikrni tasdiqlaydi. Shu munosabat bilan yana bir bor ta’kidlab aytmoqchiman: biz barpo etayotgan huquqiy demokratik davlatda so‘z va matbuot erkinligi doimo bosh qomusimiz va qonunlarimiz hamda prezident himoyasida bo‘ladi.

Ommaviy axborot vositalari xodimlarining o‘z faoliyatini qonun doirasida erkin amalga oshirishiga to‘sqinlik qilish – bu demokratik islohotlarimizga qarshi harakat, mamlakatimizning obro‘siga putur yetkazish sifatida baholanishi kerak. Sud va prokuratura organlari bizga mutlaqo yarashmaydigan bunday salbiy holatlar bo‘yicha qat’iy choralar ko‘rishi lozim”, — degan edi davlat rahbari.

Eslatib o‘tamiz, “Chegara bilmas muxbirlar” xalqaro nohukumat tashkiloti tomonidan tuziladigan So‘z erkinligi indeksining 2022-yilgi reytingida O‘zbekiston o‘z ko‘rsatkichlarini birdan 24 pozitsiyaga yaxshilab, 133-o‘ringa ko‘tarilgani xabar qilingandi.