“Xorazmdagi bolalar uyining uch nafar jabrlangan qizlariga xavfsizlik ta’minlanishiga erishdik” — Saida Mirziyoyeva

Xorazmda oilaviy bolalar uyi rahbari uch nafar voyaga yetmagan tarbiyalanuvchini 10 oy davomida viloyat adliya boshqarmasi va tuman favqulodda vaziyatlar bo‘limi boshliqlari bilan jinsiy aloqada bo‘lishga majburlagani haqida xabar berilgandi.

Prezident administratsiyasi sho‘ba mudiri Saida Mirziyoyeva Xorazmdagi bolalar uyining uch nafar jabrlangan qizlariga xavfsizlik ta’minlanishiga erishilganini ma’lum qildi.

“Ularning xavfsizligi, ruhiy va jismoniy tiklanishi hozirda ustuvor masala. Shu bilan bir vaqtda bu kabi vaziyatlarda harakat qilish va, eng asosiysi, ularning oldini olish tizimini yaratish ustida ishlashimiz kerak. Qonunlarni qat’iylashtirish va zo‘ravonlikka mutlaq toqatsizlik normalarini yaratish vaqti keldi. Barcha darajalarda.

Bu vaziyatda menga umid bag‘ishlaydigan birdan-bir jihat borki, u ham bo‘lsa oshkoralik va fuqarolik jamiyatining ovozi. Ehtimol, busiz atrofda bo‘layotgan voqealardan ojizlarcha bexabar bo‘lib qolardik.

Zo‘ravonlik doim bo‘lgan, lekin aynan hozir ochiqlik tufayli ushbu hodisa haqida baland ovoz bilan gapiryapmiz va bunga qarshi kurashish uchun real resurslarimiz paydo bo‘ldi”, — deb yozadi Mirziyoyeva.

Shuningdek, Mirziyoyeva O‘zbekiston so‘z va media erkinligi borasida zimmasiga olgan majburiyatlari, bu jarayon barcha uchun juda og‘riqli kechayotgan bo‘lsa-da, o‘z mevasini berayotganini ta’kidladi.

“Tizim bir kunda barpo etilib qolmaydi, bu uzoq yo‘l va manfaatlar kurashidir. Va bugun muammolarni erkin ko‘tarayotgan ovoz har qachongidan ham baland yangramoqda.

Befarq bo‘lmay, bu keys yuzasidan fuqarolik pozitsiyasini bildirgan barcha OAV va faollarga minnatdorlik bildiraman. Amalda ishlaydigan odil sudlov tizimini yaratish yo‘lida birlashsak, kuch bo‘lamiz!”, — deya ta’kidladi Prezident administratsiyasi sho‘ba mudiri.

Avvalroq ushbu holat yuzasidan munosabat bildirgan Prezident administratsiyasi sho‘ba mudiri Saida Mirziyoyeva qonunchilikda jiddiy muammolar borligi va ushbu bo‘shliqdan jirkanch shaxslar foydalanib qolayotganini alohida qayd etib, Bosh prokuraturadan mazkur holatga alohida e’tibor qaratib, sinchiklab o‘rganishni va huquqiy baho berishni so‘ragandi. 

Prezident administratsiyasi rahbari o‘rinbosari Komil Allamjonov pedofillarga nisbatan kimyoviy kastratsiya jazosini qo‘llash yuzasidan qonunchilikka o‘zgartirish kiritish vaqti kelganini aytgandi. 

Bolalar ombudsmani ham mehribonlik uyi qizlariga nisbatan qo‘llanadigan har qanday jinsiy jinoyatlarga og‘ir jazo turlarini qo‘llash kerak, degan pozitsiyada. Bosh prokuratura Xorazmda mehribonlik uyi qizlari zo‘rlangani ishi bo‘yicha protest kiritgan.