Talaba qiz bilan bo‘lib o‘tgan voqeadan so‘ng uch yilga qamalgan “zamdekan” sud hukmi ustidan apellyatsiya shikoyati berdi
Toshkent davlat pedagogika universiteti dekan o‘rinbosari B.Y. o‘z xonasida talaba qizga tegajog‘lik qilgani holati yuzasidan Jinoyat kodeksining 104-moddasi (qasddan badanga og‘ir shikast yetkazish) 1-qismi bilan aybdor deb topilib, 3 yil muddatga ozodlikdan mahrum qilingan edi.
Nizomiy nomidagi Toshkent davlat pedagogika universitetiFoto: “Daryo” / Madina NurmanB.Y.ning qarindoshlaridan biri “Daryo”ga ma’lum qilishicha, sud hukmi ustidan Toshkent shahar sudiga apellyatsiya tartibida shikoyat berilgan. Aytishicha, sud shikoyatni qabul qilib olgan va belgilangan muddatda javob berilishi ma’lum qilingan.Eslatib o‘tamiz, Nizomiy nomidagi Toshkent davlat pedagogika universiteti dekan o‘rinbosari o‘z xonasida talaba qizga tegajog‘lik qilgani haqida xabar berilgandi. 19-oktabr kuni dekan o‘rinbosariga nisbatan Jinoyat kodeksining 105 (qasddan badanga o‘rtacha og‘ir shikast yetkazish), 118-moddalari (nomusga tegish) bilan jinoyat ishi qo‘zg‘atilgan. 23-oktabr kuni ekspertiza javobi chiqishi bilan dekan o‘rinbosari protsessual tartibda ushlangan.
Voqea yuzasidan Saida Mirziyoyeva va Komil Allamjonov munosabat bildirib o‘tdi. Saida Mirziyoyeva bunday holatlarni doimo jamoatchilikka ma’lum qilib turilishi uchun Senat, Bosh prokuratura, IIV va OAVning harakatini birlashtiradigan yirik loyiha zarurligini bildirib o‘tdi. Komil Allamjonov bu fikrga qo‘shilishini ma’lum qilgandi.
Nima bo‘lgan edi?
18-oktabr kuni 20 yoshli M.K. Zulfiya mukofotiga tavsiyanoma olish maqsadida yoshlar ishlari bo‘yicha dekan o‘rinbosari B.Y.ning xonasiga kirgan. 37 yoshli dekan o‘rinbosari B.Y. qizdan kutib turishini so‘ragan. Qizning aytishicha, xonadan hamma chiqib ketgach, dekan o‘rinbosari charchaganini aytib, undan qahva damlab berishni so‘ragan. Qiz qahva damlamoqchi bo‘lganida erkak eshikni ichkaridan qulflab, chiroqni o‘chirgan. M.K. nimanidir sezganday yaqin do‘stiga qo‘ng‘iroq qilib, tezroq yetib kelishni so‘ragan, xonadan chiqay desa, erkak uni ushlab olib, xonasidagi divanga yotqizmoqchi bo‘lgan.
Jabrlanuvchi talaba qizFoto: “Nemolchi.uz”
Qiz qarshilik ko‘rsatgan, eshikning u tarafida esa qizning do‘sti kelib, eshikni ochishni so‘ragan. M.K. amallab oyna oldiga kelib, yordamga chaqira boshlagan. Shunda qizning aytishicha, erkak uni derazadan itara boshlagan. U qanchalik qarshilik ko‘rsatmasin kuchi yetmay, oynadan pastga tushib ketgan. Dekan o‘rinbosari esa derazani yopib, jalyuzini tushirgan va eshikni ochgan. Qizning do‘sti dekan o‘rinbosarini olib, pastga tushgan. Atrofda yig‘ilganlarga B.Y. qiz oynadan o‘zi sakragani va uni o‘zi shifoxonaga olib borishini aytgan.
Shifokorlar qizga tos suyagi sinishi, gematomalar va miya chayqalishi tashxisini qo‘ygan. Qizning yaqinlarining aytishicha, dekan o‘rinbosari tomonidan kelgan odamlar ularga o‘z ko‘rsatmalarini o‘zgartirishlari uchun pul taklif qilgan. B.Y. esa hammaga qiz o‘z joniga qasd qilgan demoqda. U o‘qigan fakultet talabalarini to‘liq onlayn ta’limga o‘tkazilgan.
Sud ishi
Qayd etilishicha, 2022-yil 7-aprel kuni jinoyat ishlari bo‘yicha Yakkasaroy tuman sudida Jinoyat kodeksining 25,118-moddasi 1-qismi va 104-moddasi 1-qismi bilan ayblangan B.Y. (1984-yilda Xorazm viloyatida tug‘ilgan) ga oid jinoyat ishini ko‘rib chiqish bo‘yicha sud jarayoni boshlanganligi va ushbu jinoyat ishi Jinoyat-protsessual kodeksining 19-moddasi (sudda jinoyat ishlarining oshkora ko‘rilishi) 1-qismiga muvofiq yopiq sud majlisida ko‘rilishi ma’lum qilingan edi.Bugun, 2022-yil 7-iyun kuni, sudlanuvchi B.Y.ga oid jinoyat ishini ko‘rib chiqish bo‘yicha yopiq sud jarayoni o‘z nihoyasiga yetib, sud hukmi e’lon qilindi.Ushbu jinoyat ishi jinoyat ishlari bo‘yicha Yakkasaroy tuman sudi sudyasi T.Kasimov raisligida ko‘rib chiqildi.E’lon qilingan sud hukmiga ko‘ra, B.Y. Jinoyat kodeksining 25,118-moddasi 1-qismida nazarda tutilgan jinoyatni sodir etganlikda aybsiz deb topilib, uning qilmishida jinoyat tarkibi bo‘lmaganligi sababli Jinoyat-protsessual kodeksining 83-moddasi (reabilitatsiya uchun asoslar) 2-bandiga asosan reabilitatsiya qilindi.B.Y. Jinoyat kodeksining 104-moddasi (qasddan badanga og‘ir shikast yetkazish) 1-qismi bilan aybdor deb topilib, unga 3 yil muddatga ozodlikdan mahrum qilish jazosi tayinlandi. Tayinlangan jazo manzil-koloniyalarda o‘tishi belgilandi.Shuningdek, manfaatdor shaxslarga mulkiy undiruv masalasida fuqarolik sud ish yurituvi tartibida murojaat qilish lozimligi tushuntirildi.Mazkur jinoiy ish bo‘yicha sudga raislik qiluvchi tomonidan sudlanuvchi, jabrlanuvchi va boshqa tomonlarga hukm ustidan shikoyat qilish tartibi va muddati tushuntirilgan.
Izoh (0)