Bosh prokuratura Xorazmda mehribonlik uyi qizlari zo‘rlangani ishi bo‘yicha protest kiritdi

Bosh prokuratura Xorazmda mehribonlik uyi qizlariga nisbatan sodir etilgan jinsiy jinoyat bo‘yicha sud hukmi va apellyatsiya instansiyasi ajrimlarining qonuniyligi o‘rganilganini ma’lum qildi.

Zo‘ravonlikka qarshi kurashuvchi “Nemolchi.uz” loyihasi Xorazm viloyatida 3 nafar mehribonlik uyi tarbiyalanuvchisi 10 oy davomida viloyat Adliya boshqarmasi boshlig‘i va tuman favqulodda vaziyatlar bo‘limi boshlig‘i tomonidan zo‘rlab kelinganini xabar qilgandi.

Jinoyat ishlari bo‘yicha Xiva tuman sudining 2022-yil 6-sentabrdagi hukmiga ko‘ra, mehribonlik uyi mudirasiga 5 yil-u 6 oyga ozodlikdan mahrum qilish jazosi tayinlangan. Yosh bolalar bilan jinsiy aloqada bo‘lgan ikki mas’ulga esa 1,5 yilga ozodlikni cheklash jazosi belgilangan.

Bosh prokuratura bergan ma’lumotga ko‘ra, sudlangan A.Masharipov va A.Kuryazovlarga yengil jazo tayinlangani va boshqa holatlar yuzasidan 29-mart kuni Oliy sud jinoyat ishlari bo‘yicha sudlov hayʼati kassatsiya instansiyasi sudiga protest keltirilgan.

Avvalroq ushbu holat yuzasidan munosabat bildirgan Prezident administratsiyasi sho‘ba mudiri Saida Mirziyoyeva qonunchilikda jiddiy muammolar borligi va ushbu bo‘shliqdan jirkanch shaxslar foydalanib qolayotganini alohida qayd etib, Bosh prokuraturadan mazkur holatga alohida e’tibor qaratib, sinchiklab o‘rganishni va huquqiy baho berishni so‘ragandi. 

Prezident administratsiyasi rahbari o‘rinbosari Komil Allamjonov pedofillarga nisbatan kimyoviy kastratsiya jazosini qo‘llash yuzasidan qonunchilikka o‘zgartirish kiritish vaqti kelganini aytgandi. 

Bolalar ombudsmani ham mehribonlik uyi qizlariga nisbatan qo‘llanadigan har qanday jinsiy jinoyatlarga og‘ir jazo turlarini qo‘llash kerak, degan pozitsiyada.