Turkiya prezidenti Rajab Toyyib Erdo‘g‘on 23-oktyabr kuni TUSAS aerokosmik kompaniya obyektiga qilingan hujumga munosabat bildirdi. Bu haqda Anadolu xabar berdi.
Siyosatchi hujumdan keyingi dastlabki daqiqalarda Turkiya xavfsizlik kuchlari zudlik bilan harakat qilgani va terrorchilarni zararsizlantirganini aytdi.
Turkiyaga cho‘zilgan iflos qo‘llar sindiriladi. Xavfsizligimizga tahdid solayotgan birorta ham tuzilma, terror tashkiloti yoki yovuzlik o‘chog‘i o‘z maqsadiga erisha olmaydi. Terrorizm tahdidlarining barcha turlari va uning tarafdorlariga qarshi kurashimiz davom etaveradi, dedi Turkiya prezidenti.
Erdog‘on Turkiya terrorchilar va ularning yordamchilariga qarshi barcha turdagi tahdidlarga qarshi qat’iyatli, keskin va ko‘p qirrali kurashni davom ettirishini ta’kidladi. Turkiya prezidenti teraktda halok bo‘lganlarga hamdardlik bildirdi va yaradorlarning tezroq sog‘ayishini tiladi.
Anqaradagi terakt
23-oktyabr kuni Anqaradagi TUSAS aerokosmik korporatsiya obyektiga ayol va erkak qurolli hujum uyushtirdi. Hujumni amalga oshirganlar zararsizlantirildi.
Qurbonlar soni 5 kishiga yetdi, yaradorlar esa 22 nafarni tashkil etmoqda. Ulardan uch nafari shifoxonadan chiqarilgan. Turkiya Ichki ishlar vaziri Ali Yerlikaya mamlakatda taqiqlangan Kurdiston Ishchi partiyasini hujumda gumon qilmoqda.
Izoh (0)