Turkiya prezidenti Rajab Toyyib Erdo‘g‘on BMT Bosh assambleyasida Yaqin Sharqdagi vaziyat haqida keskin gapirdi. Bu haqda Anadolu xabar berdi.
Erdo‘g‘on Isroil bosh vazirini tanqid qilib, uni Adolf Gitlerga qiyosladi.
“Xalqaro hamjamiyat falastinlik tinch aholini Isroil harakatlaridan himoya qilish mexanizmini ishlab chiqishi kerak. Gitler 70 yil avval insoniyat ittifoqi tomonidan to‘xtatilganidek, Netanyaxu va uning qotil tarmog‘i ham ‘insoniyat ittifoqi’ bilan to‘xtatilishi kerak”, dedi u.
Siyosatchi BMTga a’zo va buni hali amalga oshirmagan barcha davlatlarni Falastin davlatini zudlik bilan tan olishga chaqirdi.
“Umid qilamanki, bu tarixiy qadam Falastinning BMTga to‘laqonli a’zo bo‘lishi yo‘lidagi so‘nggi burilish nuqtasi bo‘ladi. BMTda Falastinni tan olmagan davlatlar hali ham bor. Men ularni ushbu muhim davrda tarixning to‘g‘ri tomonini egallash orqali Falastin davlatini tezroq tan olishga chaqiraman”, dedi Turkiya rahbari.
Erdog‘on BMTning millionlab odamlar halok bo‘lgan Ikkinchi jahon urushidan so‘ng xalqaro tinchlik va xavfsizlikni himoya qilish maqsadida tashkil etilganini eslatib o‘tdi.
“Afsuski, so‘nggi yillarda BMTning o‘z asosiy vazifasini bajarishda ojizlik ko‘rsatayotganini, tobora samara bermaydigan, qoloq va harakatsiz tuzilmaga aylanib borayotganini kuzatmoqdamiz”, dedi u.
Nutq davomida siyosatchi yahudiylar va musulmonlarga qarshi kamsitishning har qanday ko‘rinishiga yo‘l qo‘yib bo‘lmasligini ta’kidladi. U 2024-yil 15-martdagi qaror loyihasiga muvofiq BMTda islomofobiyaga qarshi kurash bo‘yicha maxsus vakil tayinlanishini tezlashtirishga chaqirdi.
Erdo‘g‘onning Netanyaxuga qarshi bayonotlari
Ta’kidlash kerakki, bu Turkiya prezidentining Netanyaxuga nisbatan ilk tanqidi emas. Mart oyida Erdo‘g‘on G‘azodagi vaziyat haqida gapirib, Yaqin Sharqda bo‘layotgan voqealarni genotsid deb atagandi. 2023-yil dekabr oyida Turkiya prezidenti Netanyaxuni Gitler bilan qiyoslagan, Isroil bosh vaziri esa bunga javob qaytargan.
“Kurdlarga qarshi genotsid o‘tkazayotgan, o‘z hokimiyatiga qarshi chiquvchi jurnalistlarni qamoqqa tashlash bo‘yicha jahon rekordini o‘rnatgan Erdo‘g‘on bizga axloq darsi berishga haqli oxirgi odamdir”, degan Netanyaxu.
Bungacha Turkiya prezidenti BMTni muomalaga layoqatsiz tashkilot deb atagan va uning tuzilmasini o‘zgartirishga chaqirgan edi. 2023-yilning kuzida G‘azodagi voqealar tufayli Turkiya Isroildagi elchisini chaqirib oldi. Joriy yil iyul oyi oxirida prezident Rajab Toyyib Erdo‘g‘on Turkiya bir paytlar Tog‘li Qorabog‘ va Liviyaga qanday kirgan bo‘lsa, Isroilga ham shunday kirishi mumkinligini aytgan edi.
Izoh (0)