Turkiya tomonidan Suriya va Iroqqa zarbalar berilishi ushbu hududlarda faoliyat olib borayotgan amerikalik xodimlar xavfsizligiga tahdid soladi, dedi AQSH Mudofaa vazirligi vakili general Pet Rayder va zudlik bilan vaziyatni barqarorlashtirishga chaqirdi.
“Yaqinda Suriyaga berilgan aviazarbalar u yerda ISHIDni yengish uchun mahalliy sheriklar bilan ish olib borayotgan amerikalik xodimlar xavfsizligiga bevosita tahdid soldi”, — deyiladi Rayderning bayonotida.
Uning so‘zlariga ko‘ra, “kelishilmagan jangovar harakatlar Iroq suverenitetiga xavf soladi”.
Mansabdor qo‘shimcha qilishicha, “avvalgidek asosiy e’tiborni ISHIDni mag‘lub qilishga qaratish va joylardagi personalning xavfsizligini ta’minlash uchun zudlik bilan vaziyatni barqarorlashtirish zarur”.
“Biz Turkiyaning xavfsizlik sohasidagi asosli xavotirlarini tan olamiz. Turkiya va mahalliy sheriklarimiz bilan o‘t ochishni to‘xtatish haqidagi kelishuvlarni saqlab qolishni muhokama qilishda davom etamiz”, — dedi general. U Mudofaa vazirligi “Suriya, Iroq va Turkiya shimolida harakatlar kuchayganidan chuqur tashvishda” ekanini ta’kidladi.
Iroq Kurdistoni hududida va Suriya shimolidagi Halab viloyatida 20-noyabrdan buyon Turkiya harbiy operatsiyasi bo‘lib o‘tmoqda. Turkiya o‘zi terrorchilik tashkiloti deb hisoblaydigan Kurdiston ishchilar partiyasi pozitsiyalariga zarbalar bermoqda. Operatsiya Istanbulning Beyo‘g‘li tumanidagi Istiqlol ko‘chasida sodir bo‘lib, olti kishining o‘limiga olib kelgan teraktdan keyin bir hafta o‘tib boshlandi. Turkiya hukumati ma’lumotlariga ko‘ra, terakt Kurdiston ishchilar partiyasi tomonidan uyushtirilgan.
Avvalroq AQSH Eron hukumatini Iroq hududiy yaxlitligini buzishni to‘xtatib, Iroq Kurdistoni hududiga zarbalar berishni bas qilishga chaqirgan edi.
IShID ekstremistik guruhi jahonning bir qator mamlakatlari va xalqaro tashkilotlar tomonidan “terrorchilik tashkiloti” deb topilgan.
Izoh (0)