G20 sammiti doirasidagi uchrashuvda AQSH prezidenti Jo Bayden turkiyalik hamkasbi Rajab Toyyib Erdo‘g‘onga Istanbuldagi terakt munosabati bilan hamdardlik bildirdi. Bu haqda Oq uy matbuot xizmati xabar berdi.
“Prezident Bayden Istanbuldagi zo‘ravonlik harakati munosabati bilan prezident Erdo‘g‘on va Turkiya xalqiga chuqur hamdardlik bildirdi hamda NATOdagi ittifoqdoshimizni qo‘llab-quvvatlashimizni tasdiqladi”, — deyiladi bayonotda.
Ma’lumot uchun, Istanbulning Beyog‘lu tumani, Istiqlol ko‘chasida 13-noyabr kuni kuchli portlash sodir bo‘lgandi. Bu ko‘cha piyodalar uchun mo‘ljallangan bo‘lib, sayyohlar uchun eng mashhur joylardan biri sanaladi. U yerda Rossiya Bosh konsulxonasi ham joylashgan. Portlashdan keyin ko‘cha butunlay to‘sib qo‘yilgan.
Istanbul Bosh prokuraturasi voqeani terakt sifatida baholadi. Sabah gazetasining politsiyaga tayanib xabar berishicha, portlashni 1999-yilda tug‘ilgan Suriya fuqarosi Ahlam Albashir amalga oshirgan, agentlik ma’lumotlariga ko‘ra, u so‘roq paytida Kurdiston ishchilar partiyasi bilan aloqadorligini tan olgan. Kurdlar teraktga aloqadorlik haqidagi ayblovlarni rad etib chiqdi.
Voqea munosabati bilan bir qator davlatlar qatorida O‘zbekiston Turkiyaga hamdardlik bildirdi. AQSH hukumati tomonidan ham rasmiy hamdardlik bildirildi. Bunga javoban Turkiya ichki ishlar vaziri Sulaymon Soylu Anqara AQSHning hamdardliklarini qabul qilmasligini aytdi.
“Biz Amerika elchixonasidan bildirilgan ta’ziyani qabul qilmaymiz. Biz hech kimga sotqinlik qilmayapmiz, lekin bizga qilinayotgan sotqinlikka ortiq chidab turolmaymiz”, — dedi u va Turkiya hukumati “hujum qayerda muvofiqlashtirilganidan xabardor ekanini” ham ta’kidladi.
Izoh (0)