Isroil va Falastinning HAMAS harakati o‘rtasida G‘azoda o‘t ochishni to‘xtatish bo‘yicha muzokaralar Qohirada natijasiz yakunlandi. Bu haqda Misr razvedka xizmatlaridagi manbalarga tayanib, Reuters xabar berdi.
Nashr suhbatdoshlariga ko‘ra, 25-avgust kuni Misr poytaxtida bo‘lib o‘tgan muzokaralarda Isroil va HAMAS vositachilar taklif qilgan barcha murosali yechimlarni rad etgan.
Shu bilan birga, yuqori martabali amerikalik rasmiy muzokaralar konstruktiv bo‘lganligi aytib, tomonlar “yakuniy va real kelishuvga” erishish istagini bildirganini ma’lum qilgan. Rasmiy, shuningdek, qolgan masalalarni hal qilish bo‘yicha ish yaqin kunlarda davom etishini, ishchi guruhlar Qohirada qolishini aytgan.
Isroil va HAMAS o‘rtasida o‘t ochishni to‘xtatish va garovga olinganlarni ozod qilish bo‘yicha muzokaralar AQSH Markaziy razvedka boshqarmasi direktori Uilyam Berns, Qatar bosh vaziri Muhammad bin Abdulrahmon Ol Tani va Misrning yuqori martabali rasmiylari ishtirokida bo‘lib o‘tgan.
Muzokaralar muvaffaqiyatsizlikka uchragani haqidagi xabarlar ortidan AQSH mudofaa vaziri Lloyd Ostin mintaqada ikkita aviatashuvchi zarba beruvchi guruhning mavjudligini uzaytirishni buyurgan. U bu qarorini Isroil mudofaa vaziri Yoav Galant bilan telefon orqali muloqoti chog‘ida ma’lum qilgan.
“Vazir Isroilning o‘zini o‘zi mudofaa qilish huquqini hamda AQSH Isroilning Eron va uning mintaqaviy ittifoqchilariga qarshi mudofaasini qo‘llab-quvvatlashini davom ettirishini yana bir bor tasdiqladi. Bu qo‘llab-quvvatlashning bir qismi sifatida u mintaqada ikkita aviatashuvchi hujum guruhini ushlab turishni buyurdi”, deyiladi Pentagon bayonotida.
Izoh (0)