Qatar hukumati G‘azo sektoridagi mojaroni hal qilish uchun vositachilik harakatlarini davom ettirmoqda, biroq maslahatlashuvlar doirasida jiddiy o‘zgarishlar ro‘y bermadi. Bu haqda Qatar TIV rasmiy vakili Majid bin Muhammad al-Ansoriy brifingda maʼlum qildi.
“Hozircha hech qanday yangilik yo‘q. Saʼy-harakatlar hali ham davom etmoqda, muzokaralar olib borilyapti”, dedi al-Ansoriy. Uning so‘zlariga ko‘ra, “barcha vositachilar hozirda ushbu kelishuvga erishish uchun qo‘llaridan kelganini qilmoqda”.
15-16 avgust kunlari Dohada G‘azo sektorida o‘t ochishni to‘xtatish va Falastinning HAMAS harakati tomonidan garovga olinganlarni ozod qilish bo‘yicha muzokaralar bo‘lib o‘tdi.
Shundan so‘ng, Misr, Qatar va Amerika Qo‘shma Shtatlari qo‘shma bayonot berib, maslahatlashuvlar ijobiy muhitda o‘tganini qayd etdi. Muzokaralarning yangi bosqichida Qo‘shma Shtatlar Qatar va Misr ko‘magida HAMAS hamda Isroil o‘rtasidagi kelishmovchiliklarni kamaytirishi mumkin bo‘lgan taklifni taqdim etdi. Biroq HAMAS Amerika tashabbusi faqat Isroil manfaatlarini hisobga olganini aytib, kelishivga rozi bo‘lmadi.
25-avgust kuni Misr poytaxtida maslahatlashuvlarning navbatdagi raundi bo‘lib o‘tdi. HAMAS matbuot kotibi Izzat al-Rishqning aytishicha, harakat delegatsiyasi Misr va Qatar vositachilari bilan uchrashuvlardan so‘ng Qohiradan jo‘nab ketgan. Uning so‘zlariga ko‘ra, HAMAS vakillari Isroildan 2-iyul kuni kelishib olgan shartlarni bajarishni talab qilgan.
Vositachilik bo‘yicha ishchi guruhlar 28-avgust kuni Dohada yana yig‘ilish o‘tkazishdi. 7-avgust kuni Markaziy razvedka boshqarmasi direktori Uilyam Berns AQSh yaqin kunlarda G‘azo sektorida sulhga erishish bo‘yicha batafsil takliflarni taqdim etishini aytgandi. Ammo hozircha bu muzokaralar samara bermayapti.
Izoh (0)