AQSH Isroilga Amerika qurol-yarog‘i va harbiy texnikasini xarid qilish uchun 3,5 milliard dollar ajratishni rejalashtirmoqda, deb yozadi CNN xabardor manbalarga tayanib.
Qayd etilishicha, Isroil bunday mablag‘ni darhol ololmaydi, chunki mamlakat xarid qilmoqchi bo‘lgan qurol-yarog‘ tizimlari hali ham ishlab chiqarish jarayonida.
CNN suhbatdoshlariga ko‘ra, 8-avgust kuni AQSH Davlat departamenti Kongressga prezident Jo Bayden ma’muriyati Isroilga “bir necha milliardlab xorijiy harbiy mablag‘lar” berishni rejalashtirayotgani haqida xabar bergan. Mablag‘lar AQSH rasmiylari aprel oyida tasdiqlagan 14,1 milliard dollarlik yordam paketidan ajratiladi.
Moliyalashtirish Isroilga Qo‘shma Shtatlardan zamonaviy qurol tizimlari va boshqa jihozlarni sotib olish imkonini beradi, deya aniqlik kiritadi CNN. Telekanal manbalariga ko‘ra, mablag‘ shu hafta, Isroil va butun mintaqa Eron va “Hizbulloh” hujumiga tayyorlanayotgan bir paytda ajratilmoqda.
Bir kun avval, 9-avgust kuni Qatar, Misr hamda AQSH Isroil va HAMASni G‘azo sektorida o‘t ochishni to‘xtatish va garovga olingan isroilliklarni ozod qilish bo‘yicha muzokaralarni qayta boshlashga chaqirgan edi. Bunga javoban Isroil bosh vaziri Binyamin Netanyaxu idorasi Isroil delegatsiyasi 15-avgust kuni tinchlik muzokaralariga jo‘nab ketishini ma’lum qildi.
Izoh (0)