Qatarda faoliyat yuritayotgan HAMAS rahbariyati AQSH tahdidi ortidan Iroqqa ko‘chib o‘tishi mumkin. Bu haqda Yaqin Sharq manbalariga tayanib, The National News xabar berdi.
Manbada aytilishicha, Vashington Qatar rasmiylari orqali HAMASga taʼsir qilishga uringan. Shu yo‘l bilan Isroil va HAMAS o‘rtasida o‘t ochishni to‘xtatishga erishish, HAMASni ko‘proq yon berishga majbur qilish maqsad qilingan.
HAMAS rahbariyati bosh idorani ko‘chirish haqida allaqachon qaror chiqargan. Iroq rasmiylari ham o‘tgan oyning o‘zida HAMAS rahbarlarini mamlakatga kiritishni maʼqullagan.
Manbalarning qo‘shimcha qilishicha, Eron Bag‘doddagi HAMAS yetakchilari, idoralari va xodimlarini himoya qilish uchun javobgarlikni bo‘yniga olgan. Ushbu kelishuv HAMAS siyosiy byurosi rahbari Ismoil Haniya, Iroq va Eron hukumatlari vakillari tomonidan ancha oldin muhokama qilingan va yakuniy xulosaga kelingan.
Iroq bosh vaziri Muhammad Shia Al Sudaniy Bag‘doddagi hukumat HAMASni qabul qilishga tayyorligini bildirgan. Bu to‘g‘risida Ismoil Haniya bilan shaxsan kelishuv bo‘lgani aytilgan.
“Iroq siyosiy guruhlari o‘rtasida HAMASning Bag‘dodga ko‘chishi bo‘yicha kelishuv yo‘q. Baʼzilar, ayniqsa, kurdlar va sunniylarning ayrim guruhlari bu hodisa Qo‘shma Shtatlar bilan kelishmovchiliklarni chuqurlashtirishidan qo‘rqishadi. Biroq konsensus yo‘qligiga qaramay, hukumatning HAMASni qabul qilish qarori bekor qilinmaydi”, — degan ismi oshkor qilinmagan Iroq oliy hukumati rasmiylaridan biri.
HAMAS rahbarlari hozircha harakat idorasi ko‘chirilishi sanasini maʼlum qilmagan. Bag‘doddagi yangi boshqarma yaqin haftalarda Muhammad al-Hafiy boshchiligida ochilishi maʼlum qilingan.
Izoh (0)