AQSH prezidenti Jo Bayden Isroil bosh vaziri Binyamin Netanyaxu bilan telefon suhbatida G‘azoda o‘t ochishni to‘xtatish va garovga olinganlarni ozod qilish bo‘yicha Qohirada bo‘lib o‘tadigan muzokaralarni muhokama qildi.
Shuningdek, Oq uy rahbari Isroilni Vashingtonning doimiy qo‘llab-quvvatlashiga ishontirgan.
Bayden va Netanyaxu AQSHning Eron tahdidlari, jumladan, Tehron tomonidan qo‘llab-quvvatlanadigan husiylar, shuningdek, HAMAS va “Hizbulloh” tahdidiga qarshi Isroil mudofaasini kuchaytirish borasidagi saʼy-harakatlarni muhokama qilgan. Qayd etilishicha, suhbatda AQSH vitse-prezidenti, Demokratik partiyadan prezidentlikka nomzod Kamala Harris ham ishtirok etgan.
Avvalroq Qatarda Isroil va HAMAS o‘rtasida almashinuv bitimi bo‘yicha muzokaralar raundi yakunlangani haqida xabar berilgan edi.
Muzokaralarda vositachi bo‘lgan Qatar, AQSH va Misr tomonidan eʼlon qilingan qo‘shma yakuniy bayonotga ko‘ra, Amerika tomoni o‘tgan haftalar davomida erishilgan kelishuvlarga asoslanib, tomonlar kelishuvni tezda amalga oshirishi uchun yangi taklif kiritgan.
Bayonotda aytilishicha, muzokaralar jiddiy va ijobiy muhitda o‘tgan. Vositachilarning so‘zlariga ko‘ra, “yaqin kunlarda o‘t ochishni to‘xtatish kelishuvi tafsilotlari, jumladan, G‘azodagi isroillik garovga olinganlar va Isroildagi falastinlik mahbuslar bilan bog‘liq masalalar bo‘yicha professional ishlar davom etadi”.
Isroil bosh vaziri Binyamin Netanyaxuning idorasi Qatardagi sammit natijalariga javoban quyidagi xabarni e’lon qilgan:
“Isroil AQSH va vositachilarning HAMAS bilan asirlarni ozod qilish bo‘yicha kelishuvga erishish borasidagi sa’y-harakatlarini qadrlaydi. Isroil vositachilarning bosimi HAMASni 27-may tamoyillarini qabul qilishga ko‘ndirishiga ishonadi, shunda kelishuv amalga oshiriladi.”
HAMASdagi manba Qatarning Al Jazeera’ga bergan intervyusida “vositachilarning sammit yakunlari haqidagi hisobotiga ko‘ra, muzokaralar natijalari 2-iyulda kelishilgan shartlarga mos kelmagan”.
Izoh (0)