AQSH davlat kotibi Entoni Blinken G‘azodagi ehtimoliy o‘t ochishni to‘xtatish va garovga olinganlarni ozod qilish bo‘yicha bo‘lajak muzokaralar oldidan Isroilga tashrif buyurdi.
Xabarga ko‘ra, Blinken 19-avgust kuni Isroil bosh vaziri Binyamin Netanyaxu, mudofaa vaziri Yoav Galant va prezident Isaak Gertsog bilan uchrashadi, 20-avgust kuni esa Misrga boradi.
Davlat departamenti vakili Vedant Patelning aniqlik kiritishicha, Blinkenning “intensiv diplomatik saʼy-harakatlari” 16-avgust kuni Vashington tomonidan Misr va Qatar ko‘magida taqdim etilgan vaqtinchalik taklifga asoslanadi.
Ushbu taklif G‘azoda o‘t ochishni to‘xtatishga erishish, barcha garovga olinganlarni ozod qilish, butun mintaqa bo‘ylab gumanitar yordam tarqatilishini ta’minlash va kengroq mintaqaviy barqarorlik uchun sharoit yaratish imkonini beradi, deya ishontirmoqda Davlat departamenti.
Blinken yana bir bor mintaqadagi barcha mamlakatlarni keskinlashuv yoki kelishuvga erishish qobiliyatiga putur yetkazadigan boshqa harakatlardan qochishga chaqirgan.
AFP nashriga ko‘ra, bu AQSH davlat kotibining 2023-yil oktyabr oyida G‘azoda urush boshlanganidan beri Yaqin Sharqqa to‘qqizinchi tashrifidir.
Avvalroq Netanyaxu birinchi navbatda Falastinning HAMAS harakatiga bosim o‘tkazish kerakligini yana bir bor ta’kidlagan edi.
HAMAS o‘jarligida davom etmoqda. U hatto Dohadagi muzokaralarga o‘z vakilini ham yubormadi. Shuning uchun bosim Isroil hukumatiga emas, HAMAS va Sinvarga qaratilishi kerak, degan edi Netanyaxu.
G‘azo bo‘yicha taklif uch bosqichli jarayonni nazarda tutadi, bu jarayonda HAMAS 7-oktyabr kuni o‘g‘irlab ketilgan barcha asirlarni ozod qiladi, evaziga Isroil o‘z kuchlarini G‘azodan olib chiqib, falastinlik mahbuslarni ozod qiladi.
Buyuk Britaniya va Fransiya tashqi ishlar vazirlari Devid Lemmi va Stefan Sejurne ham 16-avgust kuni Isroilga tashrif buyurib, G‘azo bo‘yicha kelishuv zudlik bilan amalga oshirilishi zarurligini ta’kidlagan edi.
Izoh (0)