Ertaga 15-oktyabr kuni “Bunyodkor” stadionida O‘zbekiston va BAA termalari to‘qnashadi. Jahon chempionati saralashidan o‘rin olgan uchrashuvga ikki jamoa ham durang natija bilan yetib keldi. Uchrashuvdagi g‘alaba har ikki jamoa uchun ham ahamiyatli hisoblanadi.
OFK mazkur uchrashuvga xitoylik Ma Ning boshchiligidagi hakamlarni tayinlagan. Ushbu referi yanvar oyida Qatarda bo‘lib o‘tgan Osiyo Kubogi final uchrashuvini boshqargan va Qatar foydasiga 3 ta penalti belgilagan.
Uch turdan so‘ng O‘zbekiston jamoasi 2 g‘alaba va bir durang bilan 7 ochko to‘plagan holda guruh peshqadami bo‘lib turibdi.
BAA esa uch uchrashuvdan faqat bittasida g‘alaba qozongan. Eron bilan ikkinchi turda uchrashgan jamoa kichik hisobda mag‘lub bo‘ldi. Shimoliy Koreya bilan 3-turda durang qayd etgan arablar 4 ochko bilan 3-o‘rinda bormoqda.
O‘zaro o‘yinlar natijasi:
O‘zbekiston terma jamoasi BAA bilan 15 bora to‘qnash kelgan. Uchrashuvlarning 4 tasida O‘zbekiston g‘alaba qozongan bo‘lsa, 7 o‘yinda arablarning qo‘li baland kelgan. 4 uchrashuvda durang qayd etilgan.
O‘zbekiston jamoasi 2014-yil BAA ustidan 4:0 hisobida g‘alaba qozongan. Ushbu hisob jamoaning eng yirik hisobdagi g‘alabasi hisoblanadi. 2001-yil jamoa O‘zbekiston safarda eng yirik hisobda (1:4) mag‘lub bo‘lgan.
Qiziqarlisi, o‘zbekistonliklar erishgan barcha g‘alabalar safarda qo‘lga kiritilgan. Terma jamoa BAAni Toshkentda hech qachon mag‘lub etmagan. Toshkentdagi uchrashuvlarning bittasi durang bilan tugagan va 3 tasida O‘zbekiston termasi mag‘lubiyatga uchragan.
So‘nggi 5 o‘yin natijalari
O‘zbekiston jamoasi so‘nggi 5 o‘yinning 3 tasida g‘alaba qozondi. Qolgan 2 o‘yinda jamoa Eron bilan durang qayd etgan.
BAA uchrashuvlarning 2 tasida g‘alaba qozongan, Bahrayn va Shimoliy Koreya bilan durang qayd etgan. Saralashning 2-turida Eron BAAni kichik hisobda mag‘lub etgan.
Yo‘qotishlar
Terma jamoa safida Rustam Ashurmatov sariq kartochkalari 2 taga yetgani bois ushbu uchrashuvni o‘tkazib yuboradi. Eron bilan o‘yinda zaxiradan qo‘shilgan Oston O‘runov jarohat sabab ertangi o‘yinda qatnasha olmaydi. Bosh murabbiy yordamchisi Randanovichning xabar berishicha, Abbosbek Fayzullayev mashg‘ulotlarda jarohat olgan. Uning ham o‘yinda ishtirok etishi shubha ostida.
BAA jamoasi Toshkentga 4 ta yo‘qotish bilan yetib keldi. Kuadio diskvalifikatsiya sabab jamoasiga yordam bera olmasa, Yahyo Nodir hali uchrashuvlarga to‘liq tayyor emas. Shuningdek, Abdulrahmon Solih jarohat tufayli uchrashuvda qatnasha olmaydi. Soxta O‘zbekiston pasportiga ega bo‘lgan Fabio De Lima shaxsiy sabablarga ko‘ra o‘yinni o‘tkazib yuboradi.
FIFA reytingi
O‘zbekiston terma jamoasi reytingda 60-o‘rinda qayd etilgan. Jamoa Osiyoda 8-o‘rinda joylashgan.
BAA terma jamoasi jahonda 69-o‘rinda, Osiyoda esa kuchli 10 likni yakunlab turibdi.
Eng qimmat o‘yinchilar
BAA jamoasi futbolchilarni mahalliylashtirishga ko‘proq e’tibor qaratmoqda. Tarkibdagi eng qimmat o‘yinchilarning barchasi xorijlik futbolchilar. Kelib chiqishi braziliyalik bo‘lgan, hozirda “Al-Vasl” klubi futbolchisi Lima Transfermarkt tomonidan 7 million yevroga baholangan. Yana bir braziliyalik “Sharja” futbolchisi Lukasning narxi 5 million yevro, uning jamoadoshi Luan Pereyra 4,5 million yevroga baholangan.
O‘zbekiston tarkibidagi Abbosbek Fayzullayev Rossiyaning “SSKA” klubida to‘p suradi. Portal uning transfer qiymatini 6 million yevroga baholagan. “Lans” klubi himoyachisi Abduqodir Husanov 5 millionlik qiymatga ega. Jamoa to‘purari va “Roma” klubi futbolchisi Eldor Shomurodov ham shunchaga baholangan.
Murabbiylar fikri
O‘zbekiston bosh murabbiyi yordamchisi Vlado Radmanovich:
“BAA o‘yinlarini tahlil qildik. Jamoa himoyada yaxshi o‘ynaydi va o‘yinlarda himoyaga ko‘proq tayanadi. Ushbu himoyaga qarshi bosim o‘tkazishga harakat qilamiz. Afsuski, Abbosbek Fayzullayev kechagi mashg‘ulotlarda jarohat oldi. Oston O‘runovning ham hozirda jarohati bor
Gol urolmaganimiz? Eron himoyasi kuchliligini tan olish kerak. Ammo biz ham ulardan to‘p o‘tkazmayapmiz. 3 yil avvalgi bilan solishtirsak, O‘zbekiston o‘sishga erishdi.
Ertangi o‘yin taktikasi haqida gapira olmayman. Ammo lozim bo‘lsa, tavakkal qilishimiz mumkin. Aziz Turg‘unboyev, Hojimat Erkinov kabi futbolchilar bilan o‘yinni kuchaytira olamiz. Bizga hozir yetishmayotgan futbolchi — Igor Sergeyev. Ikkinchi markaziy hujumchi yo‘qligi sabab Eldor Shomurodov to‘liq o‘ynamoqda”.
BAA bosh murabbiyi Paolu Bentu:
“Uchrashuvga odatdagidek tayyorlandik. Avvalgi o‘yinlarni tahlil qildik va futbolchilar bilan xatolar haqida fikr almashdik. O‘zbekiston haqida kecha futbolchilar bilan gaplashdik. Bugun esa rasmiy mashg‘ulotlarda qatnashamiz va ertangi o‘yin taktikalarini ko‘rib chiqamiz. Ertaga qiyin o‘yin bo‘lishini bilamiz. O‘zbekiston yaxshi jamoa va jadvalda ham oldingi o‘rinda. Jamoa Eron bilan bo‘lgan 3 uchrashuvda mag‘lub bo‘lmadi. Jamoa turli sxemalarda o‘ynay oladi va juda yaxshi o‘yinchilarga ega. Murabbiy uzoq vaqtdan beri jamoa bilan birga. Albatta, ertaga qiyinchiliklarga duch kelamiz. Ammo biz o‘zimizning yaxshi o‘yinimizni ko‘rsatamiz va kerakli natijani qo‘lga kiritamiz”.
O‘yin haqida
Ushbu uchrashuvdagi g‘alaba mezbonlarning guruhdagi yetakchiligini saqlab qolishga yordam beradi. Ochkolari soni 10 taga yetsa, O‘zbekiston jamoasi BAA bilan farqni 6 taga oshiradi. Mehmonlar g‘alabasi esa o‘zbekistonliklarning imkoniyatini keskin kamaytirib yuboradi va jamoalar hisobidagi ochkolar soni tenglashadi. Agar Abbosbek Fayzullayev jamoaga yordam bera olmasa, murabbiy himoyachilardan birini yoki Hojimat Erkinovni maydonga tushirib eski, doimiy taktika orqali o‘ynashga harakat qiladi. Murabbiy aytganidek ushbu o‘yinda taqozo qilsa, turli taktik o‘zgarishlar ham qilinishi mumkin.
BAA jamoasi KXDR bilan o‘yinda ochko yo‘qotdi va ushbu o‘yindan maksimal ochko olishga urinadi. Buning oqibatida himoyada bo‘shliqlar yuzaga kelishi mumkin. O‘zbekiston jamoasida tezkor futbolchilar borligini inobatga olsak, qarshi hujumdan mezbonlarning gol urib Toshkentdagi ilk g‘alabasini qo‘lga kiritishi mumkin.
Ammo braziliyalik futbolchilarning texnikasi yuqoriligini va to‘p bilan juda chiroyli harakatlanishini alohida e’tirof etish zarur.
Yomg‘irli havoda o‘tishi kutilayotgan ushbu uchrashuv Eron bilan bo‘lgan o‘yindan ko‘ra ochiqroq bo‘lishi va jamoalardan gollar kutishimiz mumkin.
Uchrashuvda O‘zbekiston jamoasi ko‘k, mehmonlar esa oq liboslarda maydonga tushadi.
“Bunyodkor” stadionida bo‘ladigan bahs 19:00 da boshlanadi.
Izoh (0)