“Исроилнинг Эронга ҳар қандай жавоби минтақада кескинликни кучайтиради”, деди Қатар бош вазири Муҳаммад Абдулраҳмон ал-Тани Доҳада АҚШ давлат котиби билан ўтказилган қўшма матбуот анжуманида.
“Исроилнинг Эронга ҳар қандай жавоби минтақада кескинлашувнинг кучайишига олиб келади. Биз минтақада ҳар қандай кескинлашувнинг олдини олишни истаймиз ва вазиятни тинчлантириш учун барча томонлар билан гаплашмоқдамиз”, деди у.
Унинг сўзларига кўра, “минтақада тинчлик ўрнатиш, унинг ривожланиши ва равнақи йўлида саъй-ҳаракатларни жамлаш” вақти келди.
Октябрь ойи бошида Исроил армияси Жанубий Байрутни ўққа тутгач, Эрон Исроилга ракета ҳужумларини уюштирди. Маълумотларга кўра, 200 га яқин баллистик ракеталар Исроил томонига учирилган. Эрон бу ҳужум “Ҳизбуллоҳ” етакчиси Ҳасан Насруллоҳ ва Ислом инқилоби қўриқчилари корпуси қўмондонларининг ўлдирилишига жавоб эканини таъкидлади. Исроил мазкур ҳужумга жавоб зарбаси беришни ваъда қилди. Аммо бу қачон амалга ошиши маълум қилинмади.
Аммо 18 октябрь куни интернетда “ўта махфий” деб белгиланган ҳужжатлар сиздирилгани ортидан Исроил Эронга ҳужумни кейинга қолдиргани хабар берилди. Ҳужжатларда Исроил қўшинларининг ҳаракати ва яҳудий давлатининг Эронга ҳужумга тайёргарлиги ҳақида маълумотлар бўлган.
“Ҳужжатларининг ошкор этилиши маълум стратегия ва таркибий қисмларни ўзгартириш зарурати туфайли ҳужумни кечиктирди. Қасос олинади, аммо бу кутилганидан кўпроқ вақт талаб қилади”, деди Исроил разведкаси вакили.
Изоҳ (0)