O‘zbekistonda YouTube monetizatsiyasiga cheklov qo‘yilgan. Raqamli texnologiyalar vaziri Sherzod Shermatov fikricha, bunday vaziyatda ingliz tilida kontent qilgan maʼqul.
-Si66ntUA.jpg)
Toshkent shahrida “Xalqaro hamkorlik tashabbuslari haftaligi” davom etmoqda. 23-oktyabr kuni haftalik doirasida raqamli texnologiyalarni rivojlantirishga oid muloqot bo‘lib o‘tdi. Tadbir yakunida Sherzod Shermatov jurnalistlar bilan suhbatlashdi, deya xabar berdi “Daryo” muxbiri. Vazir suhbat mobaynida O‘zbekistonda YouTube monetizatsiyasi yopiqligi masalasiga munosabat bildirdi.
“Mening tavsiyam YouTube’da ko‘proq chetga ishlashga harakat qilish kerak. Chunki monetizatsiya ingliz tilida juda ham katta. Masalan, Marg‘ilonda Inha universitetini bitirgan talabani ko‘rib qolgandik. U 3D printerlar renderini “obzor” qilib beradi. Bir kanaliga kirib ko‘ring, relslari 30 million martalab ko‘rilgan. Chunki ingliz tilidagi auditoriya juda katta. Shuning orqasidan oyiga o‘rtacha 5 ming dollar daromad topyapti. Siz o‘zbekcha kontent qilib qancha daromad topasizu, inglizcha tayyorlasangiz qancha topasiz. Shuning uchun tayyor ishlab turgan monetizatsiya mexanizmidan ko‘proq foydalanish kerak. Ingliz tili kabi talabgor tillarda ko‘proq kontent qilish kerak. Mening taklifim shu. Bizda qachon monetizatsiya ochiladi, buni kompaniyadagilar (YouTube –tahr.) hal qiladi”, — dedi vazir.
Avvalroq O‘zbekistonda yaqin kelajakda YouTube monetizatsiyasiga qo‘yilgan cheklov olib tashlanishi mumkinligi aytilgandi. Bu borada platforma rahbariga murojaat qilingani ta’kidlangan.
“Bizda mazkur masala ko‘rib chiqish jarayonlarida turibdi. Bu qancha vaqt olishini aytolmaymiz”, degan javob kelgan YouTube maʼmuriyatidan.
Ekspertlar tahliliga qaraganda, mamlakatda monetizatsiyaga cheklov qo‘yilganiga qator sabablar, xususan qonunchilik va yaxshi kontent yetishmayotgani bilan bog‘liq bo‘lishi mumkin.
Izoh (1)
Узимизни оёгимизга узимиз болта урдик. Энди эса ялинамиз ёлворамиз моентизация ёниши бари бир номаълум