Sherzod Shermatov Apple, Google, Meta va boshqa kompaniyalar bilan muzokaralar olib borish uchun AQSHga bordi
O‘zbekiston Axborot texnologiyalari va kommunikatsiyalarini rivojlantirish vaziri Sherzod Shermatov boshchiligidagi delegatsiya AQSHga tashrif buyurdi.
Delegatsiya AQSH hukumati, BMT, xalqaro moliya institutlari, axborot texnologiyalari gigantlari, venchur va investitsiya fondlari vakillari, Kremniy vodiysida faoliyat yurituvchi ekspatlar bilan muzokaralar o‘tkazadi.
O‘zbekiston elchixonasi ma’lumotlariga ko‘ra, tashrif dasturidan Apple, Google, Meta, Coursera, Visa, MasterCard va boshqa kompaniyalarning bosh ofislarida uchrashuvlar o‘rin olgan.
Uchrashuvda IT kompaniyalarning O‘zbekistonning ichki bozoridagi ishtirokini kengaytirish uchun kelishuvlarga erishish ko‘zda tutilgan.
O‘zbekistonda yuqori haq to‘lanadigan ish o‘rinlari yaratish, onlayn platformalar foydalanuvchilari uchun monetizatsiya vositalaridan foydalanish, ushbu sohadagi xizmatlar eksportini oshirish masalalari ham muhokama qilinadi.
Avvalroq SpaceX kompaniyasi O‘zbekistonda yirik loyihalar amalga oshirishga tayyor ekanini bildirgan edi.
