10-sentabr kuni Samarqandning Registon maydonidagi Ulug‘bek madrasasida bayram tadbiri o‘tkazilgan edi. Ushbu tabdir videosi internetda tarqalib, shov-shuvga sabab bo‘lgan edi. “Daryo” surishtiruvi davomida aniqlanishicha, madrasa hududida AQSh va Kanada Buxoro yahudiylari kongressi delegatsiyasi uchun madaniy kecha uyushtirilgan. 23-sentabr kuni Axborot va ommaviy kommunikatsiyalar agentligida Turizmni rivojlantirish davlat qo‘mitasi mas’ul xodimlari ishtirokida bo‘lib o‘tgan matbuot anjumanida idora vakillari ushbu voqeaga izoh berib o‘tdi, deb xabar beradi “Kun.uz”.
O‘zbekistonga faqatgina musulmon emas, boshqa dindagi shaxslar ham keladi. Shu bois sayyohlarning hozirgi kunda ham diniy an’analar amalga oshiriladigan binolarda ba’zida axloqdan tashqari harakatlarni qilishlari bo‘yicha murojaatlar kelib tushadi.Din ishlari bo‘yicha qo‘mita, Musulmonlar idorasi bilan hamkorlikda nafaqat islom, balki boshqa diniy binolar uchun ham sayyohlarning kirib-chiqishi, ust-boshi, o‘zini tutishi bilan bog‘liq qat’iy tartibni ishlab chiqyapmiz. Bu tartib tegishli binolarning barchasiga taqdim qilinadi. Turistik kompaniyalarga ham yetkaziladi. Individual tarzda keladigan sayyohlar ham bunday tartib-qoida bilan tanishtiriladi.
Saidkomil Xolxo‘jayev, Turizmni rivojlantirish davlat qo‘mitasining ziyorat turizmi bo‘yicha mas’ul vakili
Samarqand ham, Buxoro ham faqatgina ziyoratgoh emas, omma uchun ochiq joy. Bunday hududlarga daromad manbai sifatida qaraladi, ularni maksimal darajada monetizatsiya qilish biz uchun muhim. Lekin diniy tomondan muqaddas hisoblangan nuqtalarda muayyan qoidalarga rioya etilishi zarur. Bu jihatlar ishlab chiqilayotgan nizomda qayd etiladi.Shuningdek, Xivadagi Ichan qal’ada chet ellik bloger qiz yoga bilan shug‘ullangani aks etgan video tarqalgan edi. Tadbir davomida bu videoga ham izoh berib o‘tildi.Abdulaziz Oqqulov, Turizmni rivojlantirish davlat qo‘mitasi raisi vazifasini bajaruvchi
Xivadagi minora fonida video tasvirga olgan bloger qiz o‘z blogi orqali sog‘lom hayot tarzini targ‘ib qiladi, shuning uchun ham shunaqa video olingan. U tushgan video yoga targ‘iboti. Ochiq kiyim emas, sport nuqtai nazaridan talab etilgan elastik kiyimda bo‘lgan. U turgan joy diniy xarakterga ega bo‘lgan bino emasdi. Inflyuyenserlarning har biriga har bir joyga borganda nimalarga e’tibor berishi kerakligi haqida ma’lumot berilgan. Talab etilgan joyda ro‘mol ham o‘rattirganmiz.O‘zbekiston faqatgina buvijon-bobojonlarning joyi emas. Bu yerga yoshlar, zamonaviy odamlar ham keladi. Kelgan blogerlar nojo‘ya tasvirlarni tarqatishgan hollarda aloqaga chiqib, tushuntirib, suratlarni oldirtirganmiz ham. Biz ham bunga e’tibor beramiz. Lekin hammaga bag‘rikenglik bilan munosabatda bo‘lish kerak.
Behruz Hamzayev, Turizmni rivojlantirish davlat qo‘mitasi raisi maslahatchisi
Izoh (0)