Ўзбекистонда YouTube монетизациясига чеклов қўйилган. Рақамли технологиялар вазири Шерзод Шерматов фикрича, бундай вазиятда инглиз тилида контент қилган маъқул.
-Si66ntUA.jpg)
Тошкент шаҳрида “Халқаро ҳамкорлик ташаббуслари ҳафталиги” давом этмоқда. 23 октябрь куни ҳафталик доирасида рақамли технологияларни ривожлантиришга оид мулоқот бўлиб ўтди. Тадбир якунида Шерзод Шерматов журналистлар билан суҳбатлашди, дея хабар берди “Дарё” мухбири. Вазир суҳбат мобайнида Ўзбекистонда YouTube монетизацияси ёпиқлиги масаласига муносабат билдирди.
“Менинг тавсиям YouTube'да кўпроқ четга ишлашга ҳаракат қилиш керак. Чунки монетизация инглиз тилида жуда ҳам катта. Масалан, Марғилонда Инҳа университетини битирган талабани кўриб қолгандик. У 3D принтерлар рендерини “обзор” қилиб беради. Бир каналига кириб кўринг, рельслари 30 миллион марталаб кўрилган. Чунки инглиз тилидаги аудитория жуда катта. Шунинг орқасидан ойига ўртача 5 минг доллар даромад топяпти. Сиз ўзбекча контент қилиб қанча даромад топасизу, инглизча тайёрласангиз қанча топасиз. Шунинг учун тайёр ишлаб турган монетизация механизмидан кўпроқ фойдаланиш керак. Инглиз тили каби талабгор тилларда кўпроқ контент қилиш керак. Менинг таклифим шу. Бизда қачон монетизация очилади, буни компаниядагилар (YouTube –таҳр.) ҳал қилади”, — деди вазир.
Аввалроқ Ўзбекистонда яқин келажакда YouTube монетизациясига қўйилган чеклов олиб ташланиши мумкинлиги айтилганди. Бу борада платформа раҳбарига мурожаат қилингани таъкидланган.
“Бизда мазкур масала кўриб чиқиш жараёнларида турибди. Бу қанча вақт олишини айтолмаймиз”, деган жавоб келган YouTube маъмуриятидан.
Экспертлар таҳлилига қараганда, мамлакатда монетизацияга чеклов қўйилганига қатор сабаблар, хусусан қонунчилик ва яхши контент етишмаётгани билан боғлиқ бўлиши мумкин.
Изоҳ (1)
Узимизни оёгимизга узимиз болта урдик. Энди эса ялинамиз ёлворамиз моентизация ёниши бари бир номаълум