Telegram asoschisi Pavel Durov messenjer 900 million foydalanuvchiga egaligi va foyda olishga yaqinlashayotganini aytib, uni sotish ehtimolini rad etdi. Bu haqda u Financial Times nashriga bergan intervyusida ma’lum qildi.
Bu Durovning 2017-yildan keyingi birinchi intervyusi hisoblanadi. U platforma oyiga 900 million faol foydalanuvchiga egaligi, 2021-yil boshida bu ko‘rsatkich 500 million bo‘lganini aytdi.
Biz bu yil bo‘lmasa ham, kelasi yili daromad keltiramiz, — dedi Durov.
Messenjer asoschisining so‘zlariga ko‘ra, Telegram dunyodagi eng ommabop ilovalardan biriga aylangan va potensial investorlar, jumladan, oxirgi bosqichdagi global texnologiya fondlari loyihani 30 milliard dollarga baholagan.
Monetizatsiya qilishni boshlaganimizning asosiy sababi, mustaqil qolishni xohlaganimizdir. Umuman olganda, biz IPO’ni Telegram’ga kirishni demokratlashtirish vositasi sifatida ko‘ramiz, — dedi u.
Shu bilan birga, tadbirkor Telegram’ni sotish imkoniyatini rad etdi, biroq birjaga kirish ehtimolini e’lon qildi. Durov tafsilotlarni oshkor qilmadi, biroq kompaniya IPO maydoni uchun bir nechta variantlarni o‘rganayotganini ta’kidladi.
U yaqin kelajakda messenjer sun’iy intellekt algoritmlari yordamida moderatsiya tizimini yaxshilashini aytdi. Biroq Durov odamlar fikrlarini qanday ifodalashini nazorat qilmaslik kerak, deb hisoblaydi.
Tadqiqotchilarning ogohlantirishicha, Telegram jinoiy faoliyat, shuningdek, ekstremistik yoki terroristik kontent hamda feyk ma’lumotlar uchun o‘choq bo‘lib qolmoqda. Tanqidchilar Kreml Telegram’ga aloqador bo‘lishi yoki undan foydalanish imkoniyatiga ega bo‘lishi mumkinligini taxmin qiladi, Durov esa bunday da’volarni rad etgan.
Izoh (0)